Shillong, Jylliew 10
U Myntri Sorkar Pdeng ka tnad Ports, Shipping & Waterways, u Sarbananda Sonowal, u la ther tyngeh ïa ka jingkynthoh ka Congress halor ka jingtreikam ka Sorkar u Modi ha kine ki 11 snem ba la dep, da kaba pynskhem ba ka seng, ka la “duh noh ïa ka hok ban kynthoh”.
Haba ban jur halor ka jingkiew haba ïadei bad ka jingkylla dur kaba la leh hapoh ka jingïalam jong u Myntri Rangbahduh ka ri, Narendra Modi, u Sonowal u la ong ba ka Congress kaba la iehnoh ïa ki jingangnud jong ki paidbah la palat hynriew phew snem, mynta ka ïeng hakhmat ka India kaba thymmai, kaba ai khusnam ïa ka jingtreikam bad kaba pynshitom ïa ka jingbym shimkhia.
“Ka Congress ka la duh lut ïa ki hok baroh. Ki la pynpulom ïa ka jingkyrmen jong ka Thaiñ Shatei Lam Mihngi haba ki la synshar bakla ïa ka ri la palat hynriew phew snem. Ki sngi kiba dum jong ki Sorkar Congress ki la dap da ka jingïakynad, ki kam pyntriem, ki kam lehnoh kiba la tan ïa ka thaiñ ba itynnad jong ngi sha ka jingkyrduh, ka jingpynjot, ka jingbym ïasngewthuh jingmut bad ka jingïaphiah. Ka suk ka saiñ ka long ka jingphohsniew kaba jngai,” ong u Myntri.
U la bynrap, “Ïa kane la pynphai kylla tang da ka jingïalam ba shlur jong u Myntri Rangbahduh, Narendra Modi uba la shim ïa ki sienjam kiba rai ban pynkylla ïa ka thaiñ, ban burom ïa ki jingangnud jong ki paidbah, ban wad ïa ki lad ki lynti, ban wanrah ïa ka juk thymmai jong ka jingsuk bad ka jingïalong kawei, bad ha kaba kut, ban pynkylla ïa ka kum ka ‘Engine’ ka jingroi jong ka India bathymmai.”
Haba pynpaw ïa ki jingjop ba kongsan jong ka Sorkar ba la ïalam da u Narendra Modi ha kine 11 snem, u Sonowal u la batai kumno ka la pynpoi ïa ki jingmyntoi bym pat ju ïohi mynno-mynno sha man la ki bynta jong ka imlang-sahlang – kaba kyntiew ïa kiba duk ‘Garib Kalyan’, kaba pynkup bor ïa ki kynthei ‘Nari Shakti’, kaba pynkylla dur ïa ka kam rep ‘Krishak Kalyan’ bad ban pynkup bor ïa ki samla lyngba ki prokram ai jinghikai bad ki lad ïoh kam ïoh jam lyngba ki jingtreikam buit thymmai jong ki polisi kum ka ‘Start Up India’ lane ‘Digital India’.
U Sonowal u la pynshai ruh kumno palat 2.19 lak ngut ki nongrep ki la ïoh jingmyntoi na ka ‘Mission Organic Value Chain Development’, la thaw ïa 434 tylli ki ‘Farmer Producer Organisation’, kaba kynthup ïa 1.73 lak hektar.
U Sonowal u la ong ba ka Sorkar ka dang trei ban tei ïa ka ‘Viksit Bharat’ ha kane ka ‘Amrit Kala’ da kaba pynleit jingmut ïa ka ‘Seva, Sushasan and Garib Kalyan’ (Ka Jingshakri, Ka Synshar Babha bad ka bha ka miat jong kiba duk).
Palat 81 klur ngut ki briew mynta, u la ong ba ki ïoh pdiang ïa ki jingbam rashon khlem jingsiew hapoh ka ‘PM Garib Kalyan Anna Yojana’, palat 15 klur ki longïing nongkyndong ki la ïoh ïa ka um kor hapoh ka ‘Har Ghar Jal’, bad T. 3.7 lak klur la ai sha ki nongrep lyngba ka PM-KISAN.
U Sonowal u la ong ba ka jingpynkupbor ïa ki kynthei ka la sakhi ïa ki jingkiew na ka bhah kyrpang kaba 33% ha ki Ïingdorbar Thawaiñ hapoh ka ‘Nari Shakti Vandan Adhiniyam’ sha ki ‘Direct Benefit Transfer’ na bynta palat 3.9 klur ngut ki longkmie armet, bad ka jingpdiang ïa ki kynthei sha ka National Defence Academy.
Haba kdew ba ka Sorkar u Modi ka la wanrah ïa ka Thaiñ Shatei Lam Mihngi sha ka lynti pdeng jong ka jingïaid lynti jong ka roi ka par ka India da ka jingbei tyngka ka bym pat ju jia mynno-mynno bad ka jingpynleit jingmut kaba tikna, u Myntri u la ong, “Ka Thaiñ Shatei Lam Mihngi ka la kylla dur ha kaba ki kam pyntriem ki la hiar da 64% naduh u snem 2014, la weng noh ïa ka AFSPA na 75% jong ka thaiñ.”
Ka Sorkar ka la mynjur palat 3,600 tylli ki projek kiba shongdor T. 44,859 klur, la tei 10 tylli ki kad liengsuiñ ‘Greenfield’, bad pynïar ïa ki lad pynïasoh lem bad ka rep ka riang ba khlem ai dawai lyngba ki ‘Mission’ ba la pynleit jingmut bha.
