Shillong, Jylliew 10
Ki paidbah ka thaiñ Sohra bad ki shnong marjan ha ka Sngi Ba-ar ki la ïa mih ban ïaid paidbah na bynta ban pynrem jur halor ka jingshah pynthohbria ïa ka jylla bad ïa ka thaiñ Sohra kaba la ktah matïong ïa ki paidbah jong ka thaiñ.
Ki paidbah ki la sdang ban ïaid kjat ha ka por 1 baje nohphai sngi kaba la sdang naduh ka shlem treikam u Syiem ka Hima Sohra shaduh ka Ïing Dorbar Shnong Elaka, Saitsohpen Sirdarship.
Ïa kane ka jingïaid paidbah la pynlong da ka shlem treikam u Syiem ka Hima Sohra ban pynrem jur ïa ka jingshah pynsaphriang ha ki khubor bad shah pynthohbria ha ki khubor lamler ïa ka jylla bad ka thaiñ Sohra baroh kawei. Ha kane ka sngi la ïadon lang u MDC ka Sohra, Bah Titosstarwell Chyne, Bah Gavin Mylliem kum MLA, u Syiem ka Sohra, Freeman Syiem, u Syiem Khynnah bad ki Myntri.
Haba ai jingkren ha kane ka sngi hadien ba la dep ka jingïaid paidbah, na ka liang ki paidbah ka thaiñ Sohra ki la ong, ba kane ka jingïaid paidbah ka dei namar ka jingsngewkhia bad sngewdiaw mynsiem haba ïohi ïa ki khubor lamler kiba la pynthohbria ïa ka jylla bad ïa ka thaiñ Sohra.
Ki la ong ruh kane ka jingjia kam pat ju jia ha ka thaiñ Sohra baroh kawei, hynrei kyrmen ba kum kane ka jingjia ai kan dei kaba nyngkong bad kaba khatduh.
Shuh shuh ki la ong ruh ba, “U Blei um pynlehraiñ ïa ka thaiñ Sohra, u ïohi ïa ka jinglong ka akor ka thaiñ Sohra.”
“Kane ka jingkynnoh jong ki bahaïing bahasem jong ar ngut shikurim bad ka jingïalam bakla ha ki kot khubor na ri thor ban ong ba ka jylla Meghalaya ka dei ka jylla kaba sniew, ka bym shngaiñ ka la ktah shisha khamtam ïa ka Sohra namar ka dei ka jaka kaba la paw bha,” la ong ki paidbah.
Ki la ong ruh, “Phi lah ong ba ki nong Sohra ki la sngap jar lah katta phew tylli ki sngi, hynrei ka jingsngap jar jong ngi ka don ka bor sha lyndet katba ka por kam pat dei ban mih kyrkieh bad ki la bynrap ruh ba ngim ju bam ja khluit bad hynnin ka sngi la ïohi ba ki pulit ki la ïoh ban kem ïa ki briew kiba donkti ban pynïap ïa u Raja bad la kem ruh ïa ka Sonam ba suba donkti lang ha kane ka kam.”
Kumta ki paidbah ba ai jingkren ki la ainguh ïa u Blei uba najrong ba u la ai shisha ka bor na sha lyndet ban ïarap ïa ki pulit ban ai ka sap ban lapdien ïa ki nongleh kam sniew.
“Ngi la ïoh ïa uta u soh babha uba weng syndon ïa kata ka jingkahdum ïa ka shnong Sohra kaba ieit ka jong ngi, bad ka jingsngap jar, ka jingïai shah ki paidbah ka long ka jingjop ïa ka thaiñ Sohra, ha kaba barabor ka jingïai shah ka wallam ïa u soh jong ka jingbha,” la bynrap ki nongkren.
