Jowai, Jylliew 10
Hadien 2 snem ba la shong suk shong saiñ ha ka thaiñ khappud jong ka shnong Lapangap jong ka West Jaiñtia Hills District, kyndit-kynsan ki nongshong shnong Karbi ha ka step 10 tarik Jylliew ki la wan kyntur pud biang sha ka shnong Lapangap da kaba puh ïa ka pynthor jong katei ka shnong da kaba pyndonkam da ki puh shilum.
Lah ban pynkynmaw ha u snem 2023 naduh u bnai Nailur haduh u bnai Nailar ka la don ka jingkynad kaba jur hapdeng ki nongshong shnong ka Lapangap bad ki nong Tahpat jong ka West Karbi Anglong District haduh ba ka la don ka jingïasiat khnam siat ryntih ne kawang maw bad ïasiat jri para ma ki na ka daw ka jingïakam trai mar kylliang ïa ki jaka ha ki khappud jong kitei ar tylli ki shnong.
Haba pyntip halor kane, u Waheh Shnong ka Lapngap, Bah Deimonmi Lyngdoh, u la ïathuh ba ha ka step 10 tarik Jylliew ha ka por 10 baje mynstep ar tylli ki puh shilum ki la wan sha u pud u sam jong ka shnong Lapangap ban pynmadan ïa ka lum pynthor da ka jingthmu ban shna ïa ka jaka sara tynrai dieng.
Mar sien ïoh jingtip halor kane, ki nongïalam shnong jong ka Lapangap mar-mar ki la hiar sha lum pynthor ban ïakren pynbeit bad kitei ar tylli ki puh shilum ruh hadien ka jingïakren ki la sangeh noh ban lur, la ong u Waheh Shnong.
U la bynrap ba tang hadien katto-katne por, ki nong Karbi ryngkat ka jingsynran ki pulit bad katto-katne ki sengbhalang ki la wan hiar sha katei ka jaka bad beh ïa ki nongshong shnong ka Lapangap, “Ban lait na kano-kano ka jingjia ngi ruh ngi la pyrshang ban kynriah noh na katei ka jaka namar ngi wan hangne ban ïakren sngewthuh ym ban ïa pyni bor,” la ong u Bah Lyngdoh.
Halor kane, u la ong ba ki la dep ban pyntip sha ki bor pynïaid District jong ka West Jaiñtia Hills ha kaba ha ka por janmiet na ka liang u Executive Magistrate, Bah GH Passah bad u Additional Superintendent of Police, Ishan Gupta kumjuh ki bor pynïaid District jong ka West Karbi Anglong ki la pynlong ka jingïakynduh lang ha shnong Khanduli. Hapdeng ka jingïalang u Bah Lyngdoh u la ïathuh ba na ka liang ki Karbi ruh ki la kular ban sangeh noh katei ka jingtrei.
“Kum ki nongïalam shnong bad nongshong shnong ba shong ba sah ha ka thaiñ khappud, ngi don ka jingsngew artatien ïoh lehse kane ka jingkular ka jong ki nong Karbi kan kut tang ha ka ktien namar bunsien ngi shem ki jingkular jong ki long da kumwei hynrei ka kam pat da kumwei”, la ong u Bah Lyngdoh.
