Shillong, Jylliew 11
Ka ïingbishar Chief Judicial Magistrate (CJM) ka la ai jingbit ïa ki pulit ban tohkit na ka bynta 8 sngi ïa ka Sonam Raghuvanshi bad saw ngut kiwei pat kiba la shah kem halor ka jingshah pynïap u Raja Raghuvanshi ha ka thaiñ Sohra ha ka 23 tarik Jymmang.
Ïa kitei san ngut la wanlam sha ïingbishar ha ka Sngi Balang hapdeng ka jingpahara kaba jur jong ki pulit bad hadien ba la bishar bniah, la ai jingbit ban set haduh 8 sngi hapoh ka along ki pulit (Police Custody) ïa kitei baroh san ngut ban pynïaid shakhmat ïa ka jingtohkit.
Ha ka jingshisha na ka liang jong ki pulit ki la pan na ka ïingbishar ban tohkit 10 sngi hynrei ka ïingbishar ka la ai jingbit ban tohkit 8 sngi.
U Superintendent of Police ka East Khasi Hills, Bah Vivek Syiem haba pyntip halor kane, u la ong ba ka ïingbishar ka la hukum ban set 8 sngi ïa baroh 5 ngut hapoh ka along ki pulit.
Kum ban shu kdew ïa kine baroh san ngut la ïalam tian bishar hadien ba ki pulit ka jylla ki la wan ïalam noh ïa ki na Madhya Pradesh bad Uttar Pradesh. Ïa ka Sonam Raghuvanshi la lah ban pynpoi ha Shillong ha ka por shiteng synñia katba saw ngut kiwei pat la wanlam ha ka por mynstep jong ka Sngi Balang bad la pynshong ïa kine ha thanat Sadar.
Nalor ka Sonam Raghuvanshi, saw ngut kiwei pat kiba la kynnoh donkti ha kane ka kam pynïap briew ki kynthup ïa u Raj Kushwaha uba dei baieid jong ka Sonam, u Akash Rajput, u Vishal Singh Chauhan bad u Anand Kurmi.
Na ka liang jong u Bah Vivek Syiem u la pyntip ba ha shwa jong ka rai ba ai da ka ïingbishar, ki pulit ki la pan jingbit 10 sngi ban pynlong ka jingtohkit ïa baroh san ngut.
Haba pyntip ba ka jingtohkit kan sdang noh shen, u Bah Vivek u la ong haduh mynta ki pulit ki dang kem tang 5 ngut ha kaba ïadei bad ka jingjia shah pynïap u Raja Raghuvanshi.
Halor ka jingpynwandur biang ïa kaei kaba la jia, u SP u la ong ba ïa kine san ngut yn nym pat ïalam satia lashai ka sngi sha Sohra namar ki dang hap ban bishar ban tohkit shwa bad hadien ba la dep tohkit bad la dep buh lut ki jingdonkam baroh bad ïoh jingshisha baroh, na ka liang jong ka SIT kan sa shim rai lano kin hiar sha Sohra.
