Shillong, Jylliew 11
Shi bynta ban ïasnoh kti lang ha ka ban rakhe ïa ka World Environment Day, ka Meghalaya Veteran Table Tennis Associa-tion (MVTTA) kan pynlong ïa ka lympung ïalehkai ba la tip kum ka 7th Meghalaya Masters TT Team Championship.
Ïa kane ka lympung yn pynlong ha Indoor Stadium kaba ha JN Sports Complex, Polo ha ka Sngi Saitjaiñ (14 tarik). Kumta baroh ki nongïalehkai Table Tennis kiba la rangbah na kylleng ka Jylla ki lah ban wan shim bynta kum ka kynhun.
Katkum ka kyrwoh la ong ba kin don phra tylli ki kynhun ki ban wan shim bynta kiba kynthup ïa ka Go Green, Stay Fit, Save Fuel, Swachh Bharat, Save Trees, Save Water, Save Earth bad ka Protect Nature.
Ïa kane ka lympung yn pynhap pyrda ha kajuh hi ka sngi ha ka por 5:30 janmiet ha kaba u President ka Meghalaya Cricket Association (MCA) u Nababrata Bhattacharjee un long kum kongsan ha kaba yn ïadon lang ki dkhot katei ka synjuk.
