Shillong, Jylliew 11
Kum ka dak ka jingsngew burom bad ka jingaikhublei ïa ka jinglen lade ki kynhun bapher-bapher bad ki nongïalam lynti ne ki ‘Guide’ kiba don bynta ha ka ban wad ïa ki ar ngut shikurim kiba dei ki nongwan jngohkai pyrthei na Indore, Madhya Pradesh kiba la jah rngai ha ka thaiñ Sohra bad hadien katto-katne sngi la lap noh ïa ka metïap jong u Raja Raghuvanshi bad ka jingïoh kem noh ïa ka kurim jong u, ka Sonam Raghuvanshi, la pynlong ïa ka prokram pynkupburom ha ka 11 tarik u bnai Jylliew, 2025 ha ka Conference Hall jong u SDO (Civil) Sohra.
Ïa kane ka jingïalang la pynïaid da u Bah M.A. Challam, ADC bad in-charge ka SDO (Civil), Sohra Subdivision, ha kaba la ïashim bynta da ki ‘riew pawkhmat kiba kynthup ïa u Myntri ki kam jngohkai pyrthei u Bah Paul Lyngdoh, u MLA ka Sohra u Bah Gavin M. Mylliem, u MDC ka Sohra u Bah Titosstarwell Chyne, bad u IAS ophisar u Bah Cyril V. D. Diengdoh, Director ka Tnad Tourism and Secretary ka Sorkar Jylla.
Haba ai jingkren ha kane ka jingïalang, u Bah Paul u la kyntu ïa ki nongwan jngohkai sha kane ka Jylla Meghalaya ba kin leit sha kane ka thaiñ da ka jingburom bad ka jingkitkhlieh, da kaba maham ba yn nym shah ïa ki jingleh beaiñ ne kino-kino ki kam kiba pynthut ïa ka jinglong-jingman.
U Myntri u la ban jur ruh ïa ka jingdonkam jong ka kam jngohkai pyrthei kaba don ka jingkitkhlieh bad ka jingpynïaid ïalade hapoh ka imlang sahlang.
Na ka liang u Myntri u la pynbna ruh ïa ka jingthmu ban buh noh ïa ki kor ringdur ne ki CCTV ha ki jaka jngohkai pyrthei bapaw ha Sohra khnang ba kan long ka jingshngaiñ ïa ki paidbah bad ki nongwan jngohkai pyrthei bad u la pynthikna ruh ban ai jingmynjur ïa ka jaka die marbam ba kyrpang hajan ka jingkieng Mawkdok ban kyrshan ïa ki nongdie marbam trai ri bad ban pynbha ïa ki jingdonkam jong ki nongwan jngohkai pyrthei.
Na ka liang u MLA ka Sohra, Bah Gavin M. Mylliem u la ong ba ki nongjngohkai pyrthei ki long kum ki dkhot jong ka longïing kaba heh bad u la khot ïa ka jingïatreilang kaba khlaiñ hapdeng ka Sorkar, ki Dorbar Shnong bad ki nongïalam shnong ban kyntiew ïa ka kam jngohkai pyrthei hapoh ka Jylla.
U la ai ruh ka jingïaroh ïa ki bor Pulit ka Meghalaya kiba la trei shitom bad trei bha ïa ka kam haduh ban da ïohkem ïa ki briew kiba donkti halor kane ka kam pynïap ïa u Raja Raghuvanshi.
Naka liang u MDC ka Sohra, u Bah Titosstarwell Chyne u la ai ka jingïaroh ïa ki bor pulit bad kumjuh ïa ki nongïarap bad ki paidbah kiba la kyrshan ban don bynta lang haka jingwad ïa ki shikurim.
U Bah Cyril V.D. U Diengdoh u la kdew ïa artylli ki jingthmu ba kongsan ban kyntiew ïa ka jingshngaiñ bad jingpynïaid ïa ki nongjngohkai pyrthei: ka Tourist Buddy Prokram, ka ban hikai ïa ki nongshong shnong kum ki nongpynïaid ba la pynskhem, bad ka MTIME App, kaba la shna na ka bynta ka jingpynrung kyrteng ba donkam ïa ki nongjngohkai pyrthei bad ka jingsam ïa ki jingtip ha ka por kaba dei bad ki bor ba dei peit.
Ha kane ka sngi la pynkut ïa kane ka prokram da kaba sam ïa ki khusnam ha ryngkat ki syrnod bad ka song pisa kaba T.15 hajar shimet kum ka dak ban pynpaw ïa ka jingsngewnguh halor ka jingshlur jong ki katto-katne ngut kiba la ïadon bynta ban ïarap ïa ki bor pulit ha ka ban wad ïa ki shijur kiba kynthup ïa ka Tour Guides Association of Meghalaya Sengkmie (TGAM) kiba don 3 ngut, ka Tour Guides Association of Meghalaya Sohra Unit kiba don 6 ngut, ka West Jaiñtia Hills District Adventure Sports and Mountaineering Club kiba don 8 ngut bad ka Sohra Taxi Owners Association kiba don 10 ngut bad 9 ngut ki Local Guides nangta ka kynhun SDRF, ka kynhun Pulit ka Sohra, SDPO Sohra bad ka Fire & Emergency Service.
