Shillong, Jylliew 11
U Myntri ka Tnat Pule-Puthi jong ka Sorkar Jylla, Rakkam A Sangma, u la lum ïa ka jingïalang bad ki Myntri Sorkar bad ki nongthaw aiñ jong ka United Democratic Party (UDP) halor ban ïakren ïa ka jingkwah jong ka Sorkar Jylla ban pyntreikam noh ïa ka Meghalaya Education Grant (MEG).
Ha ka jingïakren bad ki lad pathai khubor ha ka Sngi Balang ka 11 tarik u Jylliew 2025, u Rakkam u la ong, ba ka tnat kan sa phah ïa ka Draft jong ka MEG sha baroh 60 ngut ki nongthaw aiñ bad ruh sha ki nongïashim bynta, kaba kynthup ïa ki khlieh jong ki jaka treikam bad ki ophisar ban ïa pyrkhat halor kane ka policy thymmai ban pyntreikam hapoh ka tnat pule-puthi.
U la ong ba ha kane ka jingïalang la don lang da u Myntri ka tnat Jngohkai Pyrthei (Tourism), Bah Paul Lyngdoh ha ka jingïadonlang u Chairman ka State Planning Board, Bah Metbah Lyngdoh bad kiwei kiwei ki MLA ka UDP ha ka jingdonlang baroh ki heh ka tnat, ngi la ïasyllok halor ka jingthmu ban pyntreikam ïa ka Meghalaya Education Grant (MEG) na ka bynta ban don tang lai jait ki skul bad ki nonghikai hapoh ka jylla.
U Rakkam u la ong ruh ba ha ka jingïalam jong u Myntri Rangbah ka Jylla, ka Sorkar ka kwah ba kan don tang lai jait ki skul bad ki nonghikai hapoh ka jylla khnang ban kyntiew ïa ka pule-puthi bad ruh ban kyntiew ïa ka bha ka miat jong ki nonghikai bad ki skul hapoh ka jylla.
Ka jingthmu jong ka Meghalaya Education Grant (MEG), kadei ban pynbeit ïa ka rukom ai jingïarap pisa sha ki skul khamtam eh haba ïadei bad ka jingsiew tulop sha ki nonghikai bad ruh ban pynbit pynbiang ïa ki jingtei (infrastructure) jong ki skul baroh, la ong u Rakkam.
Shuh shuh, u Rakkam u la ong ba mynta ka sngi ngi la sngap ïa ki jingai jingmut bad ha ka jingïalang ki nongïashim bynta ki la pynpaw ka jingsngewnguh ïa ka jingmut bad ka jingthmu jong ka Sorkar Jylla, hynrei na ka liang ka Sorkar kan hap ruh ban ïamir jingmut lang bad baroh kiba don jingkitkhlieh ban kyntiew ïa ka pule-puthi jong ka Jylla.
U Myntri u la pyntip ruh ba ka Sorkar ka la thaw ïa ka Consultation Committee ban khlieh da u Commissioner Secretary ka tnat pule-puthi, u Swapnil Tembe ha ka jingdon lang baroh ki ophisar ban ïamir jingmut bad kiwei pat ki kynhun naduh ki seng saiñ pyrthei, ki nongpynïaid ïa ki jaka pule bad kiwei kiwei de.
