Shillong, Jylliew 11
Uwei u rangbah na ka shnong Mission Com-pound ha Shillong, u la ai ka jingujor sha ki pulit halor ka jingshah tynrah ha kawei ka kali bad nalor kane, ka jingshah kren khor bad shah ktah kti.
Katkum ka khubor kaba la ïoh na ki pulit la ong ba u Bah Wester Nongphud na Mission Compound, Shillong u la ai ka jingujor ba ha ka 3 tarik mynta u bnai ha ka por kumba 10 baje mynmiet, kawei ka kali Hyundai Alcazar kaba don ïa u registration number (ML05-W-7202) ka la tynrah ïa u, katba u dang don ha lynti ban leit phai sha la ïing. Shuh shuh ki pulit ki la ong ba katkum ka jingujor ba la ai, u nongñiah jong katei ka kali ha ryngkat bad kiwei kiba don hapoh katei ka kali ki la kren ruh da ki ktien kiba khor bad ruh ban ktah kti ïa utei u rangbah.
Ki pulit ki la ïathuh ba katkum ka jingujor, la ong ba ha ka sngi kaba bud ka 4 tarik Jylliew, ki bahaïing bahasem jong utei u nongñiah ka kali Hyundai ki la leit sha utei u rangbah bad la kynnoh ba ki la dawa pisa ruh T.50,000/- na ka bynta ba kin weng noh ïa ka ejahar (FIR) bad ha kaba ki la bthah ruh ïa une u rangbah ban ïakynduh ïa ki ha ka por janmiet ha thanat, hynrei la ong na ka liang ki bahaïing jong utei u nongñiah kali, kim shym la wan mih satia sha thanat.
