Shillong, Jylliew 11
Ha ka jingbuddien ïa ka jingjia shah pynïap jong u nongwan jngohkai pyrthei na Indore, Madhya Pradesh, u Raja Raghuvanshi ha Sohra, u Superintendent of Police (SP) ka East Khasi Hills, Bah Vivek Syiem, u la ong ba ki don shibun bha ki jingïathuh bad ki jingphla ba la mih na ka Sonam Raghuvanshi bad kiwei pat kiba la shah kem halor katei ka jingjia hynrei u la bynrap pat ban aipor shwa ïa ki pulit ba kin tohkit bniah ïa baroh 5 ngut khnang ba kin lah ban ïoh ïa kaei ka jingjia kaba shisha bad kaba thikna bad hadien kata pat yn sa ïalam ïa ki sha Sohra ba kin batai ïa kaei kaba ki la leh ha katei ka sngi ba ki pynïap ïa u Raja.
Haba kren sha katto-katne ngut ki lad pathai khubor ha ka 11 tarik u bnai Jylliew, 2025, u Bah Vivek u la ong ba ka jingtohkit ïa 5 ngut ki briew kaba kynthup ruh ïa ka kurim jong u Raja Raghuvanshi, ka Sonam Raghuvanshi kan sdang noh shen.
U la ong ba la pan por haduh 10 sngi ka tohkit ïa kitei ki briew kiba donkti bad ba la ïoh pat 8 sngi hynrei lada donkam palat nangta ruh kin sa dang pynjlan shuh-shuh ïa ki sngi ban tohkit ïa kitei 5 ngut.
U Bah Vivek u la ong ba haduh mynta ki don 5 ngut kiba la shah kem halor ka jingdonkti jong ki kiba kynthup ïa ka kurim u Raja, ka Sonam Raghuvanshi, u Raj Kushwaha, u Vishal Chauhan, u Akash Rajput bad u Anand Kurmi, bad ong ba katba ka jingtohkit ka dang ïaid shakhmat yn sa lah ban tip ba hato ki donkti tang 5 ngut ne ki dang don sa kiwei pat.
Haba kylli halor ka jingleit ban rah ïa ka Sonam ban leit leh ïa ka medical check-up sha Ganesh Das Hospital bad ym ha Civil Hospital, u SP u la ong ba ka dei namarba katei ka jaka sumar ka dei jong ki kynthei katba ïa ki 4 ngut pat la leh hi hapoh thanat Sadar da u doktor.
U la pynthikna ruh ba hadien ka jingleh ïa ka ‘test’ ha Ganesh Das Hospital la lap ba ka Sonam ka khlem armet hynrei yn sa leh biang ïa ka ‘test’ hadien katto-katne sngi.
Haba kylli, hato ki bahaïing-bahasem jong ka Sonam ki donkti halor kane ka kam pynïap, u SP u la ong ba mynta ka jingtohkit ka dang sdang bad yn sa tip kham hadien lada don kiwei pat kiba donkti lang.
“Ai por shwa ïa ngi ba ngin tohkit bad ban ïoh ïa ki jingjia bashisha. Kumba ka long mynta, uwei u ong da kumwei bad uwei u ong da kumwei kumba ju leh hadien ka jingleh ïa ki kam pynïap hynrei marsien ïoh ïa ki jingjia kiba shisha bad thikna hadien ka jingtohkit, ngin sa lah ban leit sha ka jaka kaba la leh ïa ka kam”, ong u SP.
U SP u la ong ba watla ka Sonam Raghuvanshi kam pat phla ba ka dei maka kaba donkti halor ka kam pynïap ïa u kurim, u Raja Raghuvanshi hynrei ka jingleit ban kem ïa ka kadei beit katkum ki sabut kiba khlaiñ bha ba la ïoh pyrshah ïa ka.
“Ïa kata ngim pat sdang ban tohkit bha. Nga lah ban ong, hooid, ka donkti ba ngi la leit ban kem ïa ka namarba ngi don ïa ki sabut ba ka donkti hynrei ban phla kan dei tang ha ïingbishar. Da ngi la dep tohkit, ngi la lah ban pynthikna katno ka jingdonkti jong ka, ka long ha kane ka kam pynïap”, ong u SP.
U Bah Vivek u la ong ba ka plan jong ka Sonam bad ki paralok jong ka, ka la pulom noh tang hadien 7 sngi ba la thaw ïa ka kynhun Special Investigation Team kaba tohkit halor kane ka jingjia.
U la ong ba watla ki briew jong ka thaiñ Sohra ki la shah kren tohmet bha halor kane ka jingjia hynrei kim dei ki briew kiba sniew bad ki la mih beit shakhmat ban ïasnoh kti lang bad ka kynhun ïarap ha ka ban pynlong ïa ka jingwad ïa kitei shikurim.
