Tura, Jylliew 11
Hadien ka jingïalang para ma ki, ki dkhot jong ka Garo Hills Deficit School Teachers’ and Employees’ Association (GHDSTEA) ki la rai ban pynlong da ka jingshim shuti paidbah ha ka 12 bad 13 tarik u Jylliew kum ka jingpyrshah halor ka jingbym pyllait ïa ka tulop ba sahteng jong ki ha kine ki 3 bnai ba la dep.
Lyngba ka kyrwoh hynne mynsngi, ki nonghikai ki la pynpaw ïa ka jingsngewkhia bad ka jingsngewsih halor kane ka jinglong-jingman.
“La pynmih ïa ki jingbthah da ka ktien na ki DSEO bad ki SDEO ban pynkhreh bad aiti ïa ki ‘bill’ tulop ryngkat 46% ka Dearness Allowance (DA) ïa kaba la pdiang da ki ophis ba dei peit bad la mynjur ruh da ka Directorate of School Education and Literacy (DSEL), Shillong. Hynrei, wat hapdeng ka jingphah ïa ki ‘bill’ bad ka jingïaid jong 3 tylli ki bnai, ïa ka tulop jong ngi ym pat siew,” ki la pynpaw.
Ki nonghikai ki la bynrap ba ki la leit mih sha ki bor bapher-bapher, kynthup ïa u Myntri Rangbah, u Myntri ka pule-puthi bad u Commissioner ka tnad pule-puthi bad la ai ki jingkular hynrei ka jinglong-jingman ka dang sah kumjuh.
“Ban, ban shuh halor kane ka jingeh jong ngi, mynta ngi la ïoh pdiang ïa ki jingbthah ktien bathymmai ban phah biang ïa ki ‘bill’ ha ryngkat 43% ka DA – ka jingsiew kaba la dep sei da ma ngi ha ka ‘Quarter’ ba la dep (na bynta u Kyllalyngkot bad Rymphang, 2025). Kane ka jingpynkylla biang, hadien ka por ba la slem jong ka jingbym siew, ka la ktah shi kat dei ïa ngi,” ki la bynrap.
Ki nonghikai ki la bynrap ba ka jingktah ka long kaba jur bha ïa ki, naba ki ïakhun pyrshah ïa ki ram pisa kiba nang kiew, ka jingsngewsih ha ki jingsngew bad ki miet ki bym ïohthiah.
“Ka long kaba pynduh jingkyrmen ba ki dkhot nonghikai jong ka imlang-sahlang – ka lawei jong ka ri – mynta ki shah pynjah burom bad shah iehnoh beiñ kumne. Katba ngi ju ïeng beit ha syndah bad ki khynnah skul jong ngi bad ngim ju kwah ba ka jingpule jong ki kan shah pynthut namar ki jingeh jong ngi, ka jingeh ha ka liang ka pisa-tyngka kaba ngi ïakynduh ka pynlong ïa ngi ban shim ïa kane ka sienjam. Ha kum kine ki jinglong-jingman, kan sa long kaba eh bha ban pynlong ïa ki eksamin shiteng snem ban wan – ka ban ktah pat ïa ki khynnah skul,” la bynrap shuh-shuh ki nonghikai.
Kumta, ngi kyntu da ka jingsngewrit ïa ka Sorkar bad ïa ka tnad ba dei khmih ban pyllait noh kloi ïa ka tulop ‘Quarter’ banyngkong kaba sahteng jong ngi, ryngkat ka DA kaba dei hok, kaba 46%, kumba la bthah hashuwa. Kane kam dei tang ka jingdonkam pisa hynrei ka dei ruh ka jingkhot na bynta ka hok bad ka burom jong ki nonghikai kiba la shakri khlem sangeh ïa la ki skul bad ki imlang-sahlang, ki la ong.
Ki nonghikai mynta ki la kyrpad ïa ka jingtuklar ba mardor bad ban pyllait noh ïa ka tulop jong ki ryngkat ka DA ba 46% kaba ki dei hok ban ïoh.
“Ngin pynlong da ka jingshim shuti paidbah (Mass Casual Leave) ban pynpaw ïa ka jingsngewsih kthang bad ban pyrshah ïa kane ka jinglong ka bym lah pdiang. Ngi pyntip ruh sha baroh ki Secretary jong ki Unit ba ki sienjam hadien-habud halor kane ka kam yn sa pyntip hadien ka jingïalang ka ban sa pynlong,” la bynrap shuh-shuh ka kyrwoh.
