Mawkyrwat, Jylliew 11
U MLA ka Mawkyrwat, Bah Renikton Lyngdoh Tongkhar ha ka 10 tarik u Jylliew, 2025, u la plie paidbah ïa ka ïing skul bathymmai jong ka Nongbah Rangblang Government Lower Primary School ha Nongbah Dommawthung, South West Khasi Hills District. Ïa kane ka ïingskul la shna ha ka jinglut kaba kot baroh sha ka T.44.79 lak lyngba ka Infrastructure Upgradation Project Phase-II ïa kaba la bei tyngka lyngba ka State Scheme. Haba kren ha kane ka sngi kum u kongsan, u Bah Renikton u la pynpaw ba ka jinghiar jong ka jylla Meghalaya ha ka pule puthi sha trai eh katkum ka jingtih bniah, la lap ïa kiba bun ki jingduna bad ki jingbym biang jong ki skul Sorkar naduh ka ïingskul, ki painkhana, ki madan skul, bad ki jingker ïa baroh sawdong ka phyllaw jong ki skul, bad kiwei de ki jingdonkam bad kine ki la pynlong ïa ka jylla ban hiar sha ka kyrdan ba shatrai eh.
U la ong ruh ba ka jingïaleh ka Sorkar mynta, ka long ban pynbha bad thaw ki lad ki lynti baroh ban pynbiang ïa baroh ki jingdonkam ha ki skul khnang ba jylla kan kiew ha ka pule puthi.
U la ai jingïaroh ruh ïa ka jingpyntrei ïa kane ka ïing skul kaba ar mala kaba la itynnad bad wan dur bha watla katkum ka plan ka dei ban shna tang shi mala hynrei namar ka jingkhim ka jaka la hap ban shna noh ar mala.
Ha kane ka sngi la ïadonlang u Bah DG Nongsiej, District School Education Officer, South West Khasi Hills District, Mawkyrwat, ki nongpynïaid skul, ki nonghikai, ki kmie ki kpa bad ki khynnah skul.
