Shillong, Jylliew 11
Ki paidbah jong ka nongbah Shillong ha ka step jong ka Sngi Balang ka 11 tarik u Jylliew 2025 ki la ïamih khrui sha surok ban ap dngong ïa ka jingwan ka Sonam Raghuvanshi bad saw ngut ki paralok jong ka, kiba la kynnoh donkti ban pynïap ïa u Raja Raghuvanshi.
La sakhi ba ki paidbah jong ka Jylla la ka long ki longkmie ki longkpa, ki khun samla ki la ïamih sha surok, namar ki la ïoh jingtip ba ka Sonam Raghuvanshi lem bad saw ngut kiwei pat ki la wan poi sha Shillong ban pynlong ïa ka jingtohkit.
Ki don haduh lai tylli ki jaka la sakhi ba ki paidbah jong ka Jylla ki la leit ban ap bad kwah ïohi ïa ka Sonam Raghuvanshi lem bad saw ngut kiwei pat kum ha Thanat Sadar, Civil Hospital bad District Court.
Na ka liang ki paidbah kiba leit ban ap hakhmat ka Thanat Sadar ha ka Sngi Balang ka dei namar ba ki kwah ban ïohi da la ki jong ki khmat ïa ka dur jong ka Sonam Raghuvanshi kaba la shah kem noh na ka jingsuba jur ba ka donkti ban pynïap ïa la u kurim u Raja Raghuvanshi ryngkat bad saw ngut ki paralok jong ka.
Shuh shuh, la sakhi ruh ïa ki paidbah kiba ap nongpang ha Civil Hospital ha kaba ki la ïamih lut baroh shabar ban ap ïa ki saw ngut hadien ba ki la ïoh jingtip ba ki pulit ka jylla kin wanlam ïa kitei saw ngut kiba donkti ban pynïap ïa u Raja Raghuvanshi. Pynban katei ka jingap jong ki paidbah ka la pulom noh namar ki pulit kim shym la rah shuh sha Civil bad ki la rah syndon sha District Court ban tian bishar ïa ki. Katba ki paidbah kiba la wan ap hakhmat ka District Court ki la ïohi ïa ka jingwanlam ïa ka Sonam Raghuvanshi lem bad saw ngut.
Wat lada ki paidbah ki la ap bun kynta, hynrei kim shym la man thait namar ka jingkwah palat ban ïohi ïa ka dur jong ka Sonam Raghuvanshi lem bad saw ngut kiba shah kynnoh donkti pynïap ïa u Raja Raghuvanshi.
Haba ïoh ban ïakren bad ki paidbah, ki la ïathuh ba ka jingwan ap dngong jong ki kadei namar ba ki kwah palat ban ïohi ïa ka Sonam namar ba ka la pynjah burom bad kaba la pynbudnam palat ïa ka jylla jong ngi.
Ki la ong ba lada kadei shisha ka Sonam Raghuvanshi kaba pynïap ïa u Raja Raghuvanshi uba dei u lok jong ka, ki la dawa ba ki dei ban ai ka jingpynshitom kaba tyngeh.
Ki paidbah ki la pynpaw ruh ka jingbitar da kaba ong ban pynshitom da kaba tyngeh ïa ka Sonam Raghuvanshi bad ïa ki saw ngut da kaba phasi ne pynïap kumba ma ki, ki leh bad pynïap ïa u Raja Raghuvanshi.
