Dubai, Jylliew:
Ka Iran ha ka Sngi Balang, ka la pyntip ba ka la dep shim rai pyniap ia ki khyndai ngut nongleh kam sniew bad ki nongleh pyrshah ia ki aiñ jong ka ri bad kiba ka kynnoh ba ki dei ki dkhot jong ka kynhun lehnoh Islamic State. Kane ka long hadien ba ka Iran ka la kem ia ki ha kaba sdang jong u snem 2018, ha ka por jong ka jing ia kynad, ha kaba lai ngut ki dkhot jong ka Revolutionary Guards ki la duh ia ka jingim ha katei ka jingjia.
Kine ki khyndai ngut kiba shah kem, ki bym shym la ioh ia ka hok long trai ri ha kano- kano ruh ka ri, ki la shah kynnoh ba ki dei ki “moharebeh” ka kyntien Islam, kaba mut ki nonghiar thma pyrshah ia u Blei, ka jingpynkhih win da ki kam thombor, bad ka jingthied tuh ia ki tiar ïakhun thma.
Ki lad pathai khubor jong katei ka ri, ki iathuh ba kine ki 9 ngut ki dei ki shi bynta jong ka kynhun Islamic State, kiba ka Revolutionary Guards ka la bud-dien la slem hadien ba ki la iaid lait ia u pud u sam ba Shathie jong ka Iran, da ka jingthmu ban wanrah ia ki kam thombor ha kylleng sawdong jong ka ri Iran.
Ka jingshah kem jongki ka la jia hadien katto- katne bnai jong ka jingleit hiar thma ba shyrkhei jong ka Islamic State ïa ka parliament jong ka Iran ha ka nongbah Tehran bad ïa ka jingtep jong u nongseng jong ka Islamic Republic, u Ayatollah Ruhollah Khomeini.
Katba ka jingma jong ki jinghiar thma na ka kynhun Islamic State ha Iraq bad Syria ka la hiar bha naduh ba katei ka kynhun ka la shah rem, ka Iran ka la ïohi ïa ki jingthombor ba shyrkhei dang shen na ka tnat treikam jong ka Islamic State ha Afghanistan.
Katkum ka kaiphod na u High Commissioner jong ka U.N. uba dei khmih ia ka hok longbriew manbriew, la ong ba ka jingdon jong ki briew kiba shah pyniap ha Iran ka la kiew sha ka 901 ngut ha u snem 2024 bad kane ka jingkheiñ ka long kaba la bun tam lada ia nujor ia ka jing-rai pyniap naduh ki snem 2015.
