Shillong, Jylliew 11
Ka Shillong Vidyalaya SS, St. Anthony’s HSS, O.M. Roy Memorial HSS bad ka Umphyrnai Presbyterian SS ki la lah ban pynthikna ban jam sha ka semi final ha ka Under-17 (Boys) jong ka District Level Inter School Subroto Cup Football Tournament 2025 ba la pynïaid da ka shlem treikam u District Sports Officer (DSO) East Khasi Hills, hadien ba ki la ïoh jingjop ha ka Sngi Balang.
Ha ka jingïakhun quarter final kaba la long ha SAI Training Centre, ka St. Anthony’s ka la pynjem khnap ïa ka Rev. T.J. Jones Presbyterian School da shiteng dorjon (6-0 Kol). U Ïateiborlang Thawmuit u la thep ar kol ha ka minit kaba 2 & 50, katba ïa kiwei pat la thep da u Kenny George Jyrwa (16), Paosanggun khongsai (3), Raphael Kharsahnoh (8) bad u Chanmiki Suting (60).
Kumjuh, ka O.M. Roy ka la pynliem noh ïa ka Tyrsad HSS da 5-0 kol. U Hamedao Nongtdu u la thep ar kol ha ka minit kaba 10 & 31, katba ïa kiwei pat la thep da u Mebanpyndap Khongjee (13), Lamshai Jana (45) bad u Marbiang Kharbhih (57).
Ka Shillong College Higher Section Educa-tion ka la shah rem noh ha ka Umphyrnai Pres-byterian da 2-0 kol. Ïa kine kol la thep da u Batmeiaki Kharkongor ha ka minit kaba 18 bad u Famously Kharmaaw-phlang ha ka minit ba 30.
Haba phai sha kawei pat ka jingïakhun quarter final, ka Shillong Vidyalaya ka la pynliem noh ïa ka H. Elias Memorial HSS lyngba ka shi kol ba la thep da u Meteishaphrang Kharlor ha ka minit kaba 41.
Kumta ïa ki jingïakhun semi final yn pynlong ha ka Sngi Palei ha kaba ka Shillong Vidyalaya kan ïakhun pyrshah ïa ka St. Anthony’s ha ka por 10 baje mynstep, katba ka O.M. Roy Memorial ïa ka Umphyrnai Presbyterian ha ka por 11:30 mynstep na ka bynta ban ïaknieh rung sha ka final.
