Shillong, Jylliew 11
Ka lympung ïalehkai District Level Inter School Subroto Cup Football Tournament 2025 ba la pynïaid da ka shlem treikam u District Sports Officer, Ri-Bhoi District ka la sdang ha ka Sngi Ba-ar ha madan Umdihar, NSCA Mini Stadium kaba ha Pahamsyiem bad ha madan Chinchona.
Ha ki jingïalehkai Under-15 ki shynrang kiba la long ha ka sngi Balang, ka Nongjri Presbyterian HSS ka la pynliem noh ïa ka Don Bosco Hr. S. School da 6-1 kol, kumjuh ka Myngken Christian HSS ka la jop da 4-0 kol ïa ka St. John HSS, ka Ri Bhoi Presbyterian HSS ka la pynjem khnap ïa ka Savio S. School haduh 7-1 kol bad ka Mawtneng U.P & S. School ka la jop da shiteng dorjon (7-0 kol) ïa ka St. Anthony’s SS.
Haba phai sha ki jingïakhun Under-17 ki shynrang, ka St. Paul HSS ka la pynliem noh ïa ka Saiden SS da 4-0 kol, kumjuh ka Umpohwin SS ka la pynliem noh ïa ka Umsning Presbyterian HSS lyngba ka tie-breaker da 4-2 kol, ka Nongjri Presbyterian HSS ka la jop da 5-0 kol ïa ka Sunrise SS bad ka Ri Bhoi Presbyterian HSS ka la jop haduh 9-0 kol ïa ka Lai Phew Diengngan SS.
Kumta ïa kane ka lympung yn bteng biang ha ka Sngi Palei.
