Shillong, Jylliew 11
Ka Meghalaya Athletics Association (MAA) ka la rai ban jied khynnah ïalehkai ba kynsai kylleng ki district jong ka Jylla da kaba kan pynlong ïa ka selection trial bad kane ka long shi bynta ban pynkhreh ïa ka 39th National Games ka ban long ha u snem 2027.
Kane ka la wan hadien ba katei ka synjuk ka la shong jingïalang (executive meeting) myn ha ka 4 tarik mynta u bnai, la pynpaw katkum ka kyrwoh na u Secretary ka MAA, Bah Finely Lad Pariat.
Ha East bad West Jaiñtia Hills yn pynlong ha Wahïajer Stadium ha ka 28 tarik mynta u bnai naduh ka por 9 baje mynstep. Ha East Khasi Hills, Eastern West Khasi Hills, Ri Bhoi, South West Khasi Hills bad West Khasi Hills yn pynlong ha SAI Training Centre, Shillong ha ka 5 tarik u Naitung naduh ka por 9 baje mynstep.
Ha East Garo Hills, North Garo Hills, South Garo, South West Garo bad West Garo Hills yn pynlong ha Tura ha ka 12 tarik u Naitung naduh ka por 9 baje mynstep.
La ong ba ka jingpynrung kyrteng kan long lyngba ka ‘online’ bad ka tarik kaba khatduh kan long ha ka 25 tarik mynta u bnai. Ki khynnah ki dei ban long kiba la kha ha lane shwa ka 31 tarik u Nohprah 2009.
Ki jingïalehkai ki ban pynlong ha katei ka prokram ki long ki jingïakop mareh 100m, 200m, 400m, 800m, 5000m, 10000m, Long Jump, High Jump, Triple Jump, Shot Put, Discuss Throw bad Javelin Throw.
Na ka bynta ki jingtip kiba bniah ki lah ban ïakynduh ïa u Bah Pleasantly Synnah (Joint Secretary MAA: 7005421045), Kong Daisy Marweiñ, Joint Secretary 6009324164) bad Saljagring Marak, Vice President 8974488358).
