Nongstoiñ, Jylliew 12
Ha ka Sngi Palei jong ka taïew, ka Myntri Sorkar Pdeng ba khmih ïa ka Ministry of Health & Family Welfare bad ka Ministry of Chemicals & Fertilizers, ka Anupriya Patel, ka la hiar ban jurip ïa ka West Khasi Hills District ban peit bad bishar bniah ïa ki skim Sorkar Pdeng bapher bapher kiba la pyntrei hapoh ka district.
Ha katei ka sngi la pdiang burom ïa ka Myntri da u Bah Garod LSN Dykes, IAS, Deputy Commissioner ka West Khasi Hills ryngkat bad ki Additional Deputy Commissioner (ADC), ki Block Development Officer (BDO), Superintendent of Police bad ki heh Sorkar na ki tnat Sorkar bapher bapher.
Shuh shuh ha kane ka sngi ka Anupriya Patel nyngkong eh ka la leit sha ka shnong Khyllem Tiehsaw ban jurip bad peit bniah da lade ïa ka jingpyntreikam ïa ka Jal Jeevan Mission hapoh katei ka shnong bad ka la pynpaw ka jingsngewkmen halor ka rukom pyntrei ïa kane ka skim, ha kaba la lah ban ai um sha man ki longïing ha ka shnong.
Nangta, ka Myntri ka la leit ruh ban jurip ïa ka jingpyntreikam ïa ka MGNREGS bad ka skim PMAY-G ha ka shnong Sohpian bad hadien kane la pynlong ïa ka jingïalang ha kamra jingïalang jong ka ophis u Deputy Commissioner na ka bynta ban ïatai bad bishar bniah halor ki skhim Sorkar Pdeng kiba la pyntreikam hapoh West Khasi Hills District.
Na ka liang ka Myntri ka la pynpaw ba ïa ki jingtip kiba mih na kane ka jingïalang, kan sa leit rah sha Delhi khnang ban wanrah shuh shuh ïa ka roi ka par kaba myntoi ïa ki paidbah jong ka district.
Ka Myntri ka la kdew ruh ba ka thaiñ shatei lam-mihngi (North East India) ka dei ka thong ba kongsan tam jong ka Sorkar Pdeng hapoh ka jingïalam jong u Myntri Rangbahduh ka Ri, u Narendra Modi.
Ka la ong ba ka North East ka don bynta kaba khraw ha kaba ïadei bad ki kam thawaiñ bad ha ka saiñ pyrthei jong ka ri.
Shuh shuh ka la pynpaw ruh ba la kheiñ ruh ïa kane ka thaiñ kum ka khyrdop ban rung sha South East Asia, bad ha kine ki 11 tylli ki snem ba la leit noh, la sakhi ïa ka jingkylla kaba khraw ha kiba bun ki liang kynthup ïa ki surok, ka kamai kajih bad kiwei pat.
Ka la ong ruh ba ka Sorkar Pdeng ka kwah ban ïohi ba kane thaiñ kan nangkiew shaphrang bad wanrah jingmyntoi sha ka roi ka par jong ka ri hi baroh kawei.
