Bym don jaka bret metïap ha Nongriat, poi pynïap ïa u Raja sha Weisawdong

Shillong, Jylliew 12

U Superintendent of Police (SP) ka East Khasi Hills District, Bah Vivek Syiem, IPS, u la ïathuh ba ka jingtohkit ïa ka Sonam Raghuvanshi bad ïa ki 4 ngut kiba donkti ban pynïap ïa u Raja Raghuvanshi ka la sdang shisngi hadien ba la ïoh ïa ka hukum na ka ïingkashari ka District & Session Court ban pynlong ïa ka jingtohkit da ki bor pulit ha kaba kitei baroh 5 ngut ki la phla ba ki dei maki kiba donkti ban pynïap ïa u Raja Raghuvanshi ha ka riat Arliang hajan ka kshaid jong ka Weisawdong Sohra.

Haba kren sha ki lad pathai khubor ha ka 12 tarik mynta u bnai, u SP u la ïathuh ba u Raj Kushwaha u dei u ‘Mastermind’ ne uba la pynwandur ïa kane ka jingjia bad ka Sonam Raghuvanshi pat ka la long kaba don bynta ban ai ïa ki jingtip nadong-shadong katba 3 ngut pat kiba dei hi ki paralok jong u Raj Kushwaha kiba la shah thong da ka pisa ban pynïap ïa u Raja Raghuvanshi.

U SP u la ïathuh ba kitei 5 ngut ki la ïasylla ban pynïap ïa u Raja naduh ka por ba ki dang don ha Indore, Madhya Pradesh kata 11 sngi shwa ba ka Sonam bad u Raja kin ïathoh shongkurim.

U SP u la ïathuh ba u Raj u la phah ïa kitei 3 ngut naduh ka 19 tarik u Jymmang, 2025 kiba la wan poi ha Guwahati ha kaba ki la sah ha kawei ka ïingbasa bad ki la khmih ïa ka jaka ban pynïap ïa u Raja ha Guwahati. Hynrei, namar ba ka khlem urlong, na ka liang ka Sonam haba ïoh jingtip ba ka plan jong kine 3 ngut kam urlong ha Guwahati namar ba ka jingbun briew ha ki jaka, kumta ka la ong noh ïa u kurim ban leit kai noh sha Shillong bad sha Sohra.

U SP u la ïathuh ba kitei 3 ngut ruh ki la wan bud ïa ka Sonam bad u Raja bad ki la wai ruh 2 tylli ki Scooty bad ki la sah ruh ha kawei ka ïingbasa kaba don hajan ka ïingbasa ba sah ka Sonam bad u Raja ha Nongriat.

U la ïathuh ba ka la don ka jingthmu ha ka miet jong ka 22 tarik kaba dei ka sngi kaba u Raja bad ka Sonam ki la poi ha Nongriat ban pynïap ïa u Raja hynrei ka plan ka la pulom noh ba kim don jaka ban bret ïa ka met bad ki la plan biang ban pynïap hapdeng jong ka Mawlakhiat bad ka Weisawdong katba u Raja u dang leit pynjhieh hynrei ha katei ka por ruh ka la pulom noh hynrei ka dei ha Weisawdong ba ka plan ka la seisoh.

U SP u la ong ba ka Sonam ka la ong ïa u Raja ban leitkai ‘Honeymoon’ sha Shillong nangto sha Sohra bad pynkut ha Dawki, hynrei kitei 3 ngut ha ka jingïakynduh ïa u Raja bad ka Sonam ha ka step jong ka 23 tarik ha Nongriat, ki la ong ba maki ruh kin leitkai sha Dawki bad kumta ki la ïaleit lang.

U SP u la ïathuh ba ka dei ha kane ka por ba kitei 3 ngut ki la khun sha Weisawdong katba u Raja bad ka Sonam pat ki don nadien bad u Raja ruh u la leit ban bud ïa ki ha kaba ki la ïeng kai ha ka jaka ïeng kali ha Weisawdong bad kine 3 ngut ki la bat ïa u Raja bad mait ïa u da ka wait bad hadien kata ki la padai noh ïa ka met jong u Raja shapoh ka riat Weisawdong.

U la ïathuh ba ka Sonam ka la ai noh ïa ki jingdeng ksiar sha ki ba kin leit ban rah noh sha Indore ha ryngkat ka pisa.

U la ïathuh ba kitei 4 ngut hadien ba ki la pynïap ïa u Raja ki la mih na Weisawdong ha ka por 2:18 baje nohphai sngi bad ka Sonam ka la ñiah ïa ka Scooty haduh AV Point bad u Akash Rajput pat u la bret noh ïa ka raincoat jong ka katba u Anand Kurmi pat u la ñiah ïa ka Scooty ba shim wai u Raja bad buh ha Sohrarim.

U SP u la ïathuh ba ka Sonam ynda ka la poi ha Lad Mawphlang, ka la shim noh da kawei ka kali sha Shillong nangta ka la shim sa da kawei ka Tourist taksi na Shillong sha Lokhra ISBT kaba don ha Guwahati bad nangne ka la shim da ka bos haduh Siliguri bad na Siliguri ka la shim da kawei ka bos haduh Patna bad na Patna sha Arrah bad nangne sha Lucknow bad nangta na Lucknow ka la shim da kawei ka bos shaduh Indore ha kaba ka la poi ha Indore ha ka 26 tarik u Jymmang.

U SP u la ïathuh ba hadien ka jingmih ha ki lad pathai kotkhubor ba uwei na ki nongïalam lynti ne ‘Guide’ na Nongriat ba u la ïohi ba ka Sonam bad u Raja ki don bad 3 ngut ki shynrang, kumta ka la pynlong ïa kitei 5 ngut ba kin don hapdeng ka jingsheptieng.

Shuh-shuh, u SP u la ïathuh ba ha ka 2 tarik ba la lap ïa ka metïap u Raja na riat Arliang ha Weisawdong, ka Sonam ka don ha Indore, Madhya Pradesh bad ka la don ha Indore naduh ka 26 tarik u Jymmang haduh ka 8 tarik u Jylliew bad ka la plan ban mih ha ka 8 tarik ban leit sha Siliguri da ka kali ba la ‘book’ da u samla jong ka, u Raj Kushwaha hynrei namar ka jingshah kem noh jong u Akash Rajput ha ka 8 tarik, kumta ka la leit noh sha Uttar Pradesh ha katei kajuh ka sngi ban ong ba ka la shah rahbor.

U SP u la ong ba ka plan jong ki, ka long ba kan sa mih hadien katto-katne por bad ban ong pat ba ka shah rahbor sha Siliguri da ki briew.

“Ka khlem poi pyrkhat ba ha kato ka sngi hi kan don ka jingkhynra shathie ha ki ar tylli ki jylla,” ong u SP.

U la ïathuh ba ka Sonam ka la ong ba ka daw ba ka la pynïap ïa u Raja ka dei namar ba ka la shah pynbor ban ïathoh bad u Raja.