Shillong, Jylliew 12
Ka Synjuk ki Rangbah Shnong jong ka Mawrong Road Ri Bhoi District ryngkat u MLA ka thaiñ, Bah Charles Marngar ha ka 12 tarik Jylliew 2025, ki la leit ban buh da ka dorkhas sha u Symbud Myntri ka Jylla, Bah Prestone Tynsong ban dawa biang halor ka jingkyntiew kyrdan noh ïa ka Mawrong Sub Centre ha Mawrong sha ka Primary Health Centre (PHC) kaba don ha ka shnong Mawrong.
Ka synjuk lyngba u Bah Charles Marngar, u la ong ba katkum ka jingbun paid ki nongshong shnong kiba don sha ka thaiñ Mawrong Road, ka la donkam ban kyntiew noh ïa ka Mawrong Sub Centre sha ka Primary Health Centre (PHC).
U la ong ruh ba ki paidbah nongshong shnong ka Mawrong ki shem jingeh ha kaba ïa dei bad ka koit ka khiah khamtam eh na ka bynta kiba armet kiba dei ban leit kha khun ban leit sha ki hospital namar naduh na Umsning CHC shaduh Mawrong ka la jngai kumba 17 kilometre na kine ki shnong bad kumta ka buh jingeh bha ïa ki nongshong shnong.
“Haba ngi peit ïa ki longkmie ha ka thaiñ, ngi isynei namar ka jingjngai ka lynti ban leit shah sumar,” ong u Bah Marngar.
U la ong ba na ka liang u Symbud Myntri u la sngew mynjur kumta halor kane ka jingdawa jong ka synjuk bad kumta u la kubur ban shimkhia halor kane ka mat ban ban kyntiew kyrdan PHC noh ïa ka Sub Centre.
Shuh shuh, u la pynpaw ruh ka jingsngewkmen hadien ba la dep ban ïakynduh ïa u Bah Prestone namar na ka liang jong u ruh u la sngew dei ban kyntiew kyrdan noh ïa ka Mawrong Sub Centre sha ka PHC, nalor kata u Bah Prestone u la kular ban ïakren ïa kane ka kam ban pynkhreh bad ha ka jingïakren la sngewthuh ba ka don ka lynti jong ka jingkyrmen.
Haba bynrap pat na ka liang jong u Bah BB Mawkdoh, Chairman ki Rangbah Shnong ka Ri Bhoi, u la ai khublei halor ka jingpdiang bad ka jingshim khia jong u Symbud Myntri Rangbah ka Jylla, Bah Prestone Tynsong ban kyntiew kyrdan noh ïa ka Mawrong Sub Centre sha ka PHC.
