Los Angeles, Jylliew:
Katkum ki khubor, la ong ba u President jong ka America, Donald Trump, u la phah shipai biang kham bun sha ka nongbah Los Angeles (LA) kaba don ha California ban tem ia ki jingiakhih pyrshah ia ki polisi pynrung briew kiba tyngeh jong u. La ong ba kane ka jingphah shipai ka US ka la kham bun sha Los Angeles ban ia kaba sha Iraq bad Syria. Namar la ong ba utei u nongialam ka Republican, u la phah kumba 4,000 ngut ki shipai National Guard bad palat 700 ngut ki shipai duriaw sha Los Angeles ban khanglad ïa ki jingïakhih jong ki paidbah kiba la wan mih namar ka jingpyntreikam jong ka US ia ka aiñ ban khang noh ia ki nongleit buhai shnong kiba shu poi shong- sah be-aiñ hapoh ka ri khlem ki kot- ki sla bad ha ka rukom kaba dei.
Kumta, la ong ba ki don kumba 4,800 ngut ki shipai Guard bad Marine kiba la treikam ha LA ha kane ka por. Hynrei, ki don tang 2,500 ngut pat ki shipai ka US ha Iraq bad 1,500 ngut ha Syria kiba la phah da ka US na ka bynta ka jingshngaiñ ban tem ia ka jingiakynad ha kitei ki ri.
Katkum ka khubor ba la ioh lum, katei ka jingphah shipai sha Los Angeles, kan ktah haduh $134 million ia ki nongsiew khajna tang hapoh jong ki 60 sngi.
