Shillong, Jylliew 12
Ka liengsuiñ Air India kaba dei ban mih na Ahmedabad ban leit sha ka kad liengsuiñ ha London Gatwick, katba ka dang thmu ban kiew sha suiñ, ka la hap bad bthei, ha kaba la suba haduh 241 ngut ki briew ba don hapoh jong ka, ki la ïap.
Ka liengsuiñ Air India Boeing 787 Dreamliner (VT-ANB), kaba treikam naAhmedabad sha kad liengsuiñ ha London Gatwick, ka la hap bad bthei tang khyndiat por hadien ba ka la mih na kad liengsuiñ ha Ahmedabad ha ka por mynsngi.
Ha kane ka kad liengsuiñ, ki briew baroh ki don 242 ngut kynthup ïa ki ar ngut pilot bad 10 ngut ki dkhot ka cabin crew. Ki don ruh haduh 169 ngut ki nong India, 53 ngut ki nong British, 7 ngut ki nong Portugal, bad uwei u nong Canada. Ha kane ka jingjia, tang uwei u briew u la lait im.
Shuh shuh la ïathuh ba ha kane ka jingjia hap katei ka liengsuiñ, sa 5 ngut ki samla pule doktor ruh ki la khlad noh bad bun kiba la mynsaw, kata hadien ba kane ka liengsuiñ ka la leit ban tynrah bad hap ha ki jaka sah paidbah hajan ka jaka sah ki doktor jong ka BJ Medical College Hostel ha Meghaninagar, Ahmedabad.
La ïohi ïa ka durkhih jong katei liengsuiñ ka la bthei na ka pluh ding kaba heh bha ha ka por 1.38 baje mynsngi.
Ha katei ka liengsuiñ la pyndap ïa ka, da ka umphniang ne ka fuel namar ka hap ban ïaid ïa ka lynti kaba jngai kata shaduh London.
Ha kane ka jingjia, u nongïalam ba la rangbah ka BJP uba dei ruh u Myntri Rangbah barim ka Gujarat u Vijay Rupani u la duh noh la ka jingim.
Kumjuh, ar ngut kiba la khlad ki dei na jylla Manipur, kiba trei kum ki Cabin Crew ba kynthup ïa ka Lamnunthem Singson bad Nganthoi Sharma Kongbrailatpam.
