Shillong, Jylliew 12
Ha ka jingleit jurip kaba khlem poi pyrkhat ban bishar bniah ïa ki jingtei jong ka jaka ïalehkai ha South West Garo Hills, u Myntri ka tnat ïalehkai ka Sorkar Jylla, Bah Shakliar Warjri ha ka Sngi Palei u la leit ban jurip ïa ka madan ïalehkai phutbol jong ka Nagrasket bad ka International Stadium kiba ki jingtei ki dang ïaid mynta ha Ampati.
Kane ka jingleit jurip jong utei u Myntri ka pyni ïa ka jingangnud jong ka sorkar ban pynbha ïa ki jaka ïalehkai ha kylleng ka Jylla, khamtam ha ki nongkyndong bad ki distrik kiba kwah ban nangkiew shaphrang kum ka South West Garo Hills. Ha kane ka jingleit jurip la synran lang da ki heh ka district kiba kynthup ïa u ADC Ampati u Dolrich B.G Momin, u District Sports Officer u Saljagring M. Marak bad u Assistant Engineer ka SSCM.
Haba jurip ïa ka madan ïalehkai phutbol ha Nagrasket, u Bah Shakliar u la shim khia halor ka jinglong jingman jong ka madan ïalehkai phlang plastik (artificial turf) bad u la bthah ïa u Engineer ka SSCM ban sdang noh mardor ïa ki kam ban maramot. U la bthah ba ïa ka madan ïalehkai ba la pynbha dei ban aiti kloi sha ka shlem treikam jong u District Sports Officer bad ka synjuk ïalehkai phutbol jong ka Ampati khnang ban ïaid beit ïaid ryntih ka kam bad ban ïoh pyndonkam da ki paidbah.
Ha jaka jong ka International Stadium, u Myntri u la pynpaw ïa ka jingbym sngewhun halor ka jingsted bad ka rukom pyntrei kiba dang ïaid shakhmat. Namar kata, u la bthah ïa ka SSCM ban bishar bniah ïa ki kam bad ban pynthikna ba ïa ki kam kiba dang sah la pyndep hapoh ka jingpeit bniah kaba pyrkhing bha ban pynneh ïa ki kyndon bad ki por, da kaba pynksan ïa ka jingdonkam ban pynneh ïa ka jingbha ha ki jingtei ïa ki jaka ïalehkai bad ban kyntiew ïa ki sap ïalehkai hapoh ka thaiñ.
