Shillong, Jylliew 12
Ka District Magistrate (DM) ka East Khasi Hills District ka la pynmih ïa ka hukum hapoh ka kyndon 163 BNSS ba la mana ïa ka jingpyntuid beaiñ ïa ki jaboh bad kiwei ki jakhlia ha ka Wah Umkhrah bad Wah Umshyrpi.
Ha ka hukum kaba la pynmih, ka District Magistrate, Kong RM Kurbah ka la ong ba lyngba ka bor kaba la pynkup hapoh ka kyndon 163 BNSS, la buh ka jingmana ïa ka jingpyntuid beaiñ ïa ki jaboh bad kiwei ki jakhlia na ki septic tank, ïing, karkhana kali, jaka ïadie ïathied bad kiwei bad ka jingkawang bret ïa ki ñuit sha ki surok ne um ha ki jaka kiba la kdew katkum ka kaiphod ba la ai da ka Meghalaya State Pollution Control Board (MPSCB).
Ka la ong ba kino-kino kiba pynkheiñ ïa kane ka hukum kin ngat ha ka jingshah pynshitom hapoh ka kyndon 223 jong ka BNS bad shim ki lad ka aiñ katkum ki kyndon jong ka Water (Prevention and Control of Pollution) Act, 1974 bad ka Air (Prevention and Control of Pollution) Act, 1981.
Ka DM ka la ong ba katkum ka kaiphod jong ka jingjurip ba la pynlong da ka MSPCB halor ka jinglong ka Wah Umkhrah bad Wah Umshyrpi ha kaba la pynpaw ba kam don ka jingkiew ha ka jingkhuid jong ka um, khamtam ha Umshyrpi hajan Law College, Umshyrpi ha Jingkieng Umshyrpi, Umkhrah ha Demthring, Umkhrah ha Umkaliar, Umkhrah hajan ïing shohdoh (Mawlai Phudmuri) bad Umkhrah ha Mawpdang Mawlai.
La ong ruh ba namar ka jingbun ki jingbuh kyndon, kata ka Biological Oxygen Demand & Faecal Coliform, ka jingpyntuid beaiñ ïa ki jakhlia na ki septic tank sha ki um bad ka jingbret ïa ki ñiut sha ki surok, um kaba pynjakhlia ïa ka um kat haduh bym long shuh ban pyndonkam ha ïing bad ktah ïa ki dohum ruh.
Namar, kum kine ki jingleh ym tang ba ki wanrah ïa ka jingjakhlia ïa ka lyer bad ka um hynrei ki buh jingma ruh ïa ka koit ka khiah jong ki nongshong shnong kane ka district.
