Shillong, Jylliew 12
U coach jong ka Poland, Michal Probierz, u la pynbna ba u la iehnoh ïa ka kam kaba u bat hadien ba ka la don ka jingïakynad bad u khlur ïalehkai u Robert Lewandowski.
“Nga la poi sha kaba kut namar ki kynrum-kynram ha kaba ym shym la don ka jingsngewthuh jingmut. Te kumta kane ka rai ka long kaba bha tam na ka bynta ka jingbha jong ka kynhun ïalehkai ka ri ka long ba nga la iehnoh ïa ka kam kum u coach,” ong u Probierz ha ka kyrwoh ba la pynmih da ka Polish Football Association ha ka Sngi Palei.
Khyndiat sngi mynshwa, u Lewandowski u la ong ba un mih noh na ka kynhun namar ka jingbym don ka jingïadei jingmut bad u coach. Ha kawei na ka jingïakren, u la ong ba u la shim ïa kane ka rai namar ba um sngewtynnad ïa ka rukom pynsngew jong u coach ïa ka rai ban weng noh ïa u kum kapten jong u lyngba ka jingkren phone kaba shi minit.
“Ka long kaba sngewkyndit ba nga la ïoh ïa ka khubor lyngba ka jingkren phone na u coach u Micha? Probierz ba u la rai ban weng noh ïa ka jinglong kapten jong nga. Ngam shym la pynkhreh satia ïa kata, nga dang pynthiah ïa ki khun jong nga. Ka jingïakren ka la neh kumba shi minit eiei. Ka jingpynpaw ha ka website jong ka PZPN ka la pyntip ïa kane ha kaba ka la long kaba phylla ïa nga,” ong u Lewandowski.
Ka Poland ka la mad ïa ka jingshah rem ha ka Finland da 2-1 kol, kaba la buh jingeh ha kane ka lympung ïaknieh rung World Cup. U Lewandowski, 36 snem ka rta, uba la ïalehkai haduh 158 tylli ki jingïalehkai na ka bynta ka ri jong u bad uba dei u nongthep kol ba paw da kaba thep 85 kol, lah ban pynpaw ba u dei u rangïalehkai ba paw ha ka khana ïalehkai phutbol jong ka Poland.
Na ka liang u Lewan-dowski u la weng noh ïalade na ka jingïalehkai paralok kaba la long ha ka sngi Thohdieng mynshem taïew pyrshah ïa ka Moldova, da kaba aidaw ba u la thait na ka jingïalehkai khatduh jong ka La Liga na ka bynta ka Barcelona.
Lah ban kdew u Probierz uba la shimti ïa kane ka kam ha u Nailur jong u snem 2023 hadien ka jingduh jingkyrmen jong u Fernando Santos, u la lah ban pyntikna ïa ka jingïoh rung sha ka European Championship 2024 hynrei naduh katei ka por u la ïakynduh jingeh.
Na ka liang u Presi-dent ka Poland Football Association, u Cezary Kulesza, u la khot ïa u Probierz ha ka sngi Balang ban ïakren halor kane ka bynta. “Nga la ju ai ki jinglaitluid ïa ki coach, hynrei ryngkat bad kata ka wan ka jingkitkhlieh. Te kumta ha kaba nyngkong nga khmih lynti ba ka kynhun kan lah ban ïalehkai bha. Hynrei kim kine ki wanrah ka jingeh ha ka kynhun ïalehkai ka ri.”
