London, Jylliew:
Ki heh ka United States bad ka China ha ka Sngi Ba-ar ki la mynjur ia ka jingthaw lad ban wanrah biang ia ka jingiatreilang ha ka liang ka khaïi- ka pateng bad ka jingshalan ia ki mar na katei ka ri sha kawei pat, da kaba peit-thuh ia ki aiñ bad ki khajna ba kitei ki arliang ri ki la wanrah thymmai ha kine ki khyndiat bnai.
Ha ki ar sngi ba kut jong ka jingïakren jnit-jnat bha hapoh London, u Myntri ka tnat khaïi-pateng jong ka U.S., u Howard Lutnick, u la ong ha ki nongthoh khubor ba ka jingïateh kular ka buh “ka doh ha ki shyieng” jong ka jingïateh ba la ïasoi ha u bnai ba la dep ha Geneva ban pynjem ïa ki khajna kiba pynjulor ia ka jingiadei bad ka iadie-iathied bad ka khaïi-pateng jong baroh arliang mamla.
Hynrei ka jingïateh kular ha Geneva ka la kylla khongpong namar ka jingbteng jong ka China ban khanglad ïa ka jingshalan ïa ki marpoh khyndew ba kongsan, kaba la pynlong ïa ka sorkar jong u Trump ban jubab da ki jingpynïaid ïa ka jingshalan marpoh khyndew jong ka hi kaba khanglad ïa ka jingshalan ïa ki tiar shna ‘semi-conductor’, ki dawai bad kiwei kiwei ki mar khaïi sha China.
U Lutnick u la ong ba ka jingïateh soskular ba la ïasoi ha London kan plie lad ban ioh weng noh ïa ki katto-katne ki jingkhang jong ka U.S. kaba dang shen ban shalan mar shabar ri, hynrei um shym la ai jingtip bniah hadien ba ka jingïakren ka la kut ha ka por shiteng miet ha katei ka sngi.
Ha ka jingpynshai ba kyrpang, u Myntri ka tnat khaïi-pateng jong ka China, u Li Chenggang, u la ong ruh ba ka jingiakren jong ki ka la poi sha ka rukom kaba dei bad ba yn rah biang ia ka mat ba kyrpang shaphang ka khaïi- ka pateng sha ki nongialam jong ka U.S. bad ka China ha ki khyndiat por ban wan.
