Jowai, Jylliew 12
Ka Lotus SS, San Shnong SS, Musniang SS, K.B Memorial SS, Wapung SS bad ka Seiñ Raij Tuber HSS kin long napdeng hynriew tylli ki kynhun ban ïaknieh ïa ka nam lahduh ha ka Under-15 (shynrang) bad Under-17 (shynrang bad kynthei) ha ka District Level Inter School Subroto Cup Football Tournament 2025 ba la pynïaid da ka shlem treikam jong ka District Sports Officer (DSO) East Jaiñtia Hills.
Kine ki kynhun kin hap ban ïakhun final ha ka Sngi Thohdieng ha la ki jong ki kyrdan ïalehkai ki ban long ha madan Deinchynrum kaba ha Khliehriat.
Ha ki jingïakhun semi final Under-17 (shynrang) kiba la long ha ka Sngi Palei, ka Wapung HSS ka la pynliem noh ïa ka Little Star SS da 1- kol, katba ka Seiñ Raij Tuber ka la jop da 1-0 kol ïa ka K.B Memorial SS.
Haba phai sha ka semi final jong ka Under-17 ki kynthei, ka Lotus SS ka la pynliem noh ïa ka Dkhiah Presbyterian HSS da 4-0 kol, katba ka San Shnong SS ka la jop da 1-0 kol ïa ka Khliehriat HSS.
Te, namar kata ki jingïakhun final ha ka Under-17 ki kynthei kin long hapdeng ka Lotus SS pyrshah ïa ka San Shnong SS ha ka por 10 baje mynstep, kumjuh ha ka U-15 (shynrang) ka Musniang SS ïa ka K.B Memorial SS ha ka por 11:30 bad ha ka U-17 (shynrang) ka Wapung SS ïa ka Seiñ Raij Tuber HSS ha ka por 1 baje nohphai sngi.
Kumjuh, ha ka West Jaiñtia Hills District kane ka lympung ka la jam noh sha ka final ha kaba ki kynhun kin ïaknieh ïa ka nam lahduh ha ka Sngi Thohdieng. Ïa kane ka lympung la pynïaid da ka shlem treikam u District Sports Officer (DSO) West Jaiñtia Hills District ha madan Kiang Nangbah Stadium, Jowai.
Ka jingïakhun final ha ka Under-17 (kynthei) kan long hapdeng ka Kiang Nangbah HSS pyrshah ïa ka North Liberty HSS. Ha ka Under-17 (shynrang) ka Marian Hill HSS ïa ka North Liberty HSS. Katba ha ka Under-15 (shynrang) ka St. Dominic HS School pyrshah ïa ka Govt. Boys HSS.
Haba phai sha ka jingïakhun semi final jong ka Under-15 (shynrang) kaba la long ha ka Sngi Palei ha madan Kiang Nangbah Stadium Jowai, ka St. Dominic HSS ka la jop da 1-0 kol ïa ka H.K. Singh Memorial SS. Katba ka Govt. Boys HSS ka la jop da 2-0 kol ïa ka Laishnong HSS.
Ha ka Under-17 (shynrang) ka Marian Hills HSS ka la jop da 1-0 kol ïa ka Sawlyngdoh HSS. Katba North Liberty HSS ka la pynliem noh ïa ka Kiang Nangbah lyngba ka tie-breaker da 9-8 kol.
