Shillong, Jylliew 12
Ka O.M. Roy Memorial HSS bad ka Shillong Vidyalaya SS ki la jam sha ka final Under-17 (Boys) jong ka District Level Inter School Subroto Cup Football Tournament 2025 ba la pynïaid da ka shlem treikam u District Sports Officer (DSO) East Khasi Hills.
Kine ki kynhun kin ïaknieh ïa ka nam lahduh ha ka Sngi Thohdieng ha ka por 10 baje mynstep ha SAI Training Centre, Shillong bad ban mihkhmat ïa kane ka district sha ka State Level Inter School Subroto Cup Football Tournament 2025 ka ban sa long shen.
Haba phai sha ki jingïakhun semi final kaba la long ha ka Sngi Palei, ka O.M. Roy ka la lah ban pynliem noh ïa ka Umphyrnai Presbyterian SS da 4-0 kol. Ha kane ka jingïakhun ki rangïalehkai ka O.M. Roy ki la lah ban pynpaw ïa ka jingtbit ha kaba u Marbiang Kharbhih u la ïoh ban thep ar kol ha ka minit kaba 30 & 57. Ïa kiwei pat ki kol la thep da u Menangpyndap Khongjee (36) bad u Lamshai Jana (59). Ka Umphyrnai haduh kaba kut jong ka jingïalehkai kam shym la lah ban pynphai bad ka la mad ïa ka jingshah rem.
Haba phai sha kawei pat ka jingïakhun semi final, ka Shillong Vidyalaya SS ka la pynliem noh ïa ka St. Anthony’s HSS da 2-0 kol.
Wat la ka jingïakhun ka la long kaba ïakhaid bha, hynrei ka Shillong Vidyalaya ka la ïoh ban thep shi kol ha ka kylla step lyngba u Superlative Khongngaiñ ha ka minit kaba 40, katba ïa kawei pat ka la thep ha ka kylla miet lyngba u Kitbok Maskut (72) na ka bynta ban ïoh jingjop shi syndon.
