Shillong, Jylliew 12
U Sordar jong ka Elaka Myntang Bah America Rynga u don jingkyrmen ba ka Sorkar Jylla lyngba ka tnat PWD kan siangrong noh ïa ka surok kaba la sniew na Mawkawir shaduh Mawlakhiat kaba hap ha Shella Konstitwensi, East Khasi Hills District.
Kane ka jingkyrpad u Bah America ka dei hadien ba u nonglum khubor U Nongsaiñ Hima u la poi sha Mawlakhiat ban leit lum khubor halor ka jingjah rngai u Raja Raghuvanshi bad ka kurim ka Sonam Raghuvanshi ha ka por ba ki kiew na Nongriat sha Mawlakhiat ha ka step jong ka 23 tarik Jymmang 2025.
Kumjuh, u nonglum khubor haba u la hiar biang sha Mawlakhiat hadien ba la ïoh kem ïa ka Sonam bad saw ngut ki shynrang kiba la donkti ban pynïap ïa u Raja, ka la pynlong ïa u Sordar ban kyrpad ïa ka Sorkar ba ka dei ban siangrong noh khnang ban pynsuk ïa ki nongjngohkai pyrthei haba ki ïaid lyngba ka shnong Mawlakhiat ban leit sha Nongriat.
U nonglum khubor u la lap ba kane ka surok ka la nang sniew naduh Mawkawir haduh ban da poi sha shnong Mawlakhiat namar ki kali rit ki la tyngkhuh ïa ki maw khamtam ha jaka ba long them.
Namar kata, u Bah America u la kyrpad ïa u MLA ka Shella, Bah Balajied Synrem ban peit lem ïa kane ka surok kaba sniew bha kaba long kumba shi kilometer khnang ban pynsuk ïa ki nongjngohkai pyrthei.
Wat la ka surok ka long kaba sniew hynrei ki nongjngohkai pyrthei na kylleng ki jylla ki wan poi sha Mawlakhiat na bynta ban ïaid kjat sha Nongriat.
