Shillong, Jylliew 12
U Bah Mathew Keneth Makdoh uba dang shu shah pynbam smai kum u MDC shu sieh ha Khasi Hills Autonomous District Council (KHADC), u la pynpaw ba u dei uba donbok namar u khlem poi pyrkhat ba ka Voice of the People Party (VPP) kan jied ïa u ban long kum u MDC shu sieh hadien ba u la shah rem ha ka ilekshon MDC ba dang shu dep na Nongpoh Konstitwensi.
Ïa u Bah Mathew Keneth Makdoh la pynbam smai kum u MDC shu sieh da u nongbishar ka District Council Court ha ka 11 tarik mynta u bnai ha kamra treikam u Chairman ka KHADC.
Kane ka jingshah thung u Bah Mathew kum u MDC shu sieh ka dei hadien ba ka Sorkar Jylla lyngba ka tnat District Council Affair ka pynmih ïa ka jingpynbna hadien ba u Lat ka Jylla u la ai jingmynjur ïa ka kyrteng jong u kaba la phah ka jingtyrwa da ka Executive Committee ka KHADC.
Da ka jingshah thung u Bah Mathew kum MDC shu sieh, ka VPP mynta ka la poi ka jingdon ki MDC haduh 18 ngut namar 17 ngut ki dei kiba la shah jied lypa da ki paidbah ha ka ilekshon ba dang shu dep.
Kum ban shu pynkynmaw, u Bah Mathew u dei kyrtong ka VPP ha Nongpoh hynrei u la shah rem noh ha ka Kong Rona Khymdeit kaba dei ka kyrtong na ka NPP.
Na ka liang u Bah Mathew u la ai khublei ïa ka VPP kaba la jied ïa ka kyrteng jong u bad un don ha KHADC ban ïatreilang bad ki MDC ka VPP na bynta ka jingmyntoi ki paidbah ka ri Khasi.
U la ïathuh shwa ban rung sha ka saiñ pyrthei u la trei kum u shakri Sorkar ha DRDA ban peit ïa ki thaiñ nongkyndong bad u la iehnoh ïa ka kam ha u snem 2022. Ha u snem 2023 u la sdang ban rung sha ka VPP hadien ba u la ïakynduh ïa u Dr. Ricky A.J Syngkon ha kito ki por ba um pat long MP.
U la pynpaw haba u la iehnoh ïa ka kam Sorkar um shym la don jingthmu ban rung sha ka saiñpyrthei hynrei ynda u la bishar bniah ïa ki nongïalam ka VPP kiba kwah shisha ïa ka jingkylla ha ka synshar-khadar dei na kane ka daw u sa rung sha ka saiñpyrthei.
