Shillong, Jylliew 12
Ka jingkieng Umshyrpi kaba dei ka jingkieng kaba bun na ki kali ki ïaid lyngba kane ka surok ban leit sha ki shnong bapher bapher bad sha kiwei kiwei ki District kum sha ki thaiñ Nongstoiñ, Mawkyrwat, Sohra, Mairang bad Mawsynram kan khang haduh saw miet lynter namar ka dang ïaid ka jingpyntrei ïa ka kam.
Ka jingsdang ban khang ïaid kali na katei ka surok kan sdang naduh ka miet Sngi Palei jong ka 12 tarik u Jylliew 2025 haduh ka 15 tarik naduh ka 10 baje mynmiet haduh 5 baje mynstep.
Ïa kane ka jingkhang ïa katei ka surok la pynbna da u Superinten-dent of Police (SP) ka East Khasi Hills District, Bah Vivek Syiem.
U Bah Syiem u la kyntu ïa ki kali kiba leit ba wan na ki thaiñ Upper Shillong sha jingkieng Umshyrpi bad kiba leit ha ki thaiñ Lumdiengjri sha ki thaiñ Upper Shillong ba kin pyndonkam noh ïa ki surok Laitumkhrah, Madarting, Laitkor, Pomlakrai, Sanmer Upper Shillong.
U la pyntip ruh ba tang ïa ki kali kiba ïadei bad ki kam kyrkieh yn shah ban ïaid na katei ka jingkieng.
Haba pyrshang pat ban ïakren bad ki nongñiah kali kiba pyndonkam ïa ka leit ka wan man ka sngi na ka jingkieng Umshyrpi la ki sngew kumno halor kane ka bynta. Na ka liang katto-katne ki la kyntait ban kren hynrei ki don pat katto-katne kiba la pynpaw ba ki ai ka jingïatreilang ba la pynbeit ka sorkar katba ki dang shna ïa katei ka jingkieng.
Ki nongñiah kali ki la ong ruh ba ïa mynta ba ka sorkar ka la khang kin hap ban ïaid noh na Laitkor bad na Pomlakrai bad ynda la dep kin sa ïaid biang na jingkieng Umshyrpi.
Shuh shuh ki la pynpaw ruh ïa ka jingshem jynjar lada khang ïa ka jingkieng Umshyrpi, namar ban ïaid na Laitkor ka lynti ka la jngai palat, hynrei ki la ong ba namar ka jingbha bad ban suk ruh ïa ki hadien-habud kin ai ka jingïatreilang bad ka sorkar.
Haba kylli pat, lehse kin don kiba donkam kyrkieh ban ïaid na katei ka jingkieng, na ka liang ki nongñiah kali ki la ong ba kata hi ka shong ha ka sorkar la kin pynïaid naei.
