Shillong, Jylliew 12
Ka ïingbishar Meghalaya High Court ka la pynsangeh noh ïa ka hukum jong ka Executive Committee ka Khasi Hills Autonomous District Council (KHADC) ba pynhiar kyrdan biang ïa u nongtrei ba la dep thungkam pura (Permanent) sha ka kam nongtrei Casual.
Kane ka hukum ka la mih na ka ïingbishar u Justice B Bhattacharjee ha ka Sngi Palei, kata haba la bishar ïa ka aplikeshon ba la mudui da u Bah Banrikupar Suting pyrshah ïa ka KHADC lem bad ar ngut kiwei pat.
Ha ka aplikeshon, u Bah Banrikupar u la kyrpad ïa ka ïingbishar ba kan pynsangeh noh shuwa ïa ka jingtreikam ka Office Order No.357 ba pynmih ha ka 30/05/2025 da ka KHADC, ha kaba ïa ka jingthungkam pura jong u nongmudui kum u Enforcement Constable la pynduh pyndam noh bad la thung biang ïa u kum u Casual Enforcement Constable.
Ha kane ka hukum ba la pynmih la ong, “Na ki jingïasaid bad na ki kot ki sla la paw ba une u nongmudui u la shah thung kum u nongtrei casual lyngba ka Office Order No. 528 ‘B’ ba 01.06.2019. Hadien ba pyndep ïa ka jingshakri ba 5 snem kum u casual Enforcement Constable, lyngba ka Office Order No.585 ba 14.08.2024, la thungkam pura noh ïa u kum u Enforcement Constable halor ka rai ba la shim da ka Executive Committee ka KHADC.”
Shuh shuh ha kane ka hukum la ong, “Da ka Office Order No.357 ba pynmih ha ka 30.05.2025, ka jingthungkam ïa une u nongmudui kum u Process Server la pynduh pyndam noh bad la pynhiar kyrdan biang ïa u sha ka kam casual kum u Enforcement Constable.”
Ka hukum haba kdew, ka la ong, kane ka Office Order kam shym la pyni ne kdew ba une u nongmudui u la ïoh pdiang ïa ka byrta (notice) lane ai ïa ka lad ban bishar ha shuwa ka jingshim rai ban pynduh noh ïa ka jingthungkam pura kum u Process Server.
Ka ïingbishar ka la ong ba wat la ha kane ka Office Order, la kdew ba ka jingthungkam pura ïa ka jingshakri jong une u nongmudui ka long shabar ka rule kaba treikam kum ka dak ka jingpynkylla ïa ka hukum thungkam pura, hynrei ym (order) shym la batai ne pynpaw ïa ka bynta jong ka rule ka bym shym la bud haba thungkam pura ïa ka jingshakri jong u.
Kumta halor kitei ki bynta halor, ïa mynta ha kane ka por, la sngew ïahap ban pynsangeh shuwa shipor ïa ka jingtreikam jong ka Office Order No. 357 ba pynmih ha ka 30.05.2025 tad haduh ka sngi shong bishar biang.
Shuh shuh la bynrap ba ïa kane ka kam dei ban buh ha ryngkat bad ka mukotduma writ petition ba pura.
