Shillong, Jylliew 12
Ka Central Bureau of Investigation (CBI), Guwahati ka la kem ïa u Professor jong ka Zoology bad Dean jong ka School of Life Sciences ka North Eastern Hill University (NEHU), Shillong bad ïa uwei ‘riewshimet uba dei trai jong kawei ka kompeni na Guwahati, Assam halor ka jingkynnoh donkti katba u dang shim ïa ka pisa kaba T.3.43 lak ha Guwahati University Guest House, Guwahati.
Kine ar ngut ki la shah kem markhmat napoh ka Guwahati University Guest House, Guwahati hadien ka jingpynap shrip da ka CBI ha ka Sngi Ba-ar, ha ka por ba u trai jong ka kompeni u dang aiti ïa ka pisa sha une u Professor.
Ka CBI ka la pynrung mukotduma ha ka 11 tarik u Jylliew 2025, pyrshah ïa kine kiba shah kynnoh donkti hadien ka jingïoh jingtip kaba thikna ba u trai ka kompeni bad u Professor ka Zoology bad Dean ha NEHU nalor kiwei pat kiba donkti ha ki kam bamsap.
Ïa une u Professor la kynnoh ba u la pdiang ïa kane ka pisa na ka bynta ban pynïoh ïa ki kam shalan ïa ki tiar ba ïadei bad ka saïan, ki tiar laboratory bad kiwei pat sha une u trai kompeni bad ban pyllait kham kloi ïa ki ‘bill’ jong u.
Ka CBI ha ka kyrwoh ka la pyntip ba la dep ban rah sha ïingbishar ha ka 12 tarik ha Guwahati ban tian bishar bad ka jingkhynra ïa ki jaka sah jong kitei ki dang ïaid ban lap ïa ki kot ki sla kiba ïadei bad kane ha bun ki jaka bad ka jingtohkit kan dang bteng.
Ha ka FIR la kdew ïa ka kyrteng u Nirmalendu Saha, Professor ka “Zoology and Dean of School of Life Sciences”, ka NEHU, Shillong, Meghalaya bad ïa u ‘riewshimet la ithuh kum u Pranjal Sharma ba shong ba sah ha Bishnu Rabha Path, Beltola, Guwahati, Assam.
