Shillong, Jylliew 12
U Kilco R Marak u la pynkut noh ïa ka kam ïalehkai hadien ba u la ïoh ban mihkhmat ïa ka Jylla ha ki katto- katne ki lympung ïalehkai ba la dep.
Kum u dkhot ba paw jong ka kynhun ïalehkai (senior) ki shynrang, u Kilco u la mih madan nyngkong ha ka samoi ïalehkai 2019-20 ha kaba u la ïoh ban shim 3 wiket bad tied 25 run pyrshah ïa ka Puducherry ha ka Syed Mushtaq Ali Trophy (SMAT) ha ka 9 tarik u Naiwieng 2019.
Ha baroh ki jingïalehkai u la shim 13 wiket na 19 tylli ki jingïalehkai bad kaba khatduh ka dei ha u Risaw 2023. Ka jingïalehkai kaba nyngkong ka long pyrshah ïa ka Puducherry ha kaba u la lah ban pyndep da ka jingïalehkai kaba 20.92 (average) bad 15.60.
U Kilco, 32 snem ka rta, u la mih madan ruh ha ar tylli ki jingïalehkai jong ka Ranji Trophy ha u snem 2021-22 pyrshah ïa ka Madhya Pradesh bad ka Gujarat. U la don ruh hapoh ka kynhun ïalehkai jong ka Vijay Hazare Trophy jong katei ka samoi, wat la um shym la rung ha ka thup ïalehkai jong ka kynhun.
Na ka liang ka synjuk ïalehkai jong ka Meghalaya Cricket Association (MCA) ka la ai khublei kitbok- kitrwiang ïa utei u rangïalehkai ba un nangkiew shaphrang ha ka jingïaid lynti jong u.
