Shillong, Jylliew 12
Ka Confederation of Ri Bhoi Peoples (CoRP) ha ka kyrwoh na u Working President, Bah Pateng Myrsing, ha ka 11 tarik Jylliew, 2025, ka la pynpaw ïa ka jingsngewkhia halor ka jingjia shah pynïap jong u Raja Raghuvanshi katba ïa ka met jong u la lap na ka jingring dur ba la pynher da ka drone ha ki bynta ka riat arliang jong ka Wei Sawdong ha Sohra, bad la khwai ruh ïa ka ha kajuh ka sngi ka 2 tarik Jylliew.
Une u nongïalam jong ka seng u la pynpaw ba katei ka jingjia ka la jia tang namar ka jingtlot ki aiñ jingïada ka sorkar jylla, ba ka jingbym shimkhia wat haba la pyntreikam ïa ka MRSSA bad ka jingpynsahteng ban pynurlong ïa ka Inner Line Permit (ILP).
U Bah Pateng u la pynrem ruh ïa ka jingkren beiñ bad kynnoh sniew u hynmen jong u Raja Raghuvanshi bad ruh na ka longïing ka Sonam Raghuvanshi pyrshah ïa ki trai shnong Sohra bad ruh ïa ki bor sorkar jylla.
Namar kata, ka seng ka la dawa ba ka sorkar jylla ka dei ban pynshitom khlem jingmap ïa kitei kiba la kynnoh sniew shwa ban lap ïa ka metïap u Raja bad ki dei ban ïoh ka saja kaba biang kum ka bai mynraiñ khmat wat la u hynmen jong u Raja Raghuvanshi u la panmap lyngba ki lad pathai khubor ba katei ka jingpanmap ym dei satia ban pdiang.
Ha kajuh ka por ruh, u la ong ba katei ka jingjia ka dei ka jingjia ban pynkyndit bynriew ïa ka sorkar jylla, namar na ki khubor la sngewthuh ba katei ka kam runar jong kitei ki runar ki la jied khnang ïa ka jylla Meghalaya namar kam don ki aiñ pyrkhing ki ba biang bad ki briew nabar ki ïoh ban rung bad mih suk khlem jingteh jingkhum.
Shuh shuh, u la ong ba ka sorkar ka dei ban ai khusnam sha u nongïalam lynti ne u guide ba la tip kum u Bah Albert Pde, namar dei lyngba jong u ba la ïoh ksai ïa ka jingdon kitei ki runar ha ka por ba dang don lang bad u Raja Raghuvanshi.
