Shillong, Jylliew 13
Ka Lympung Ki Seng Kynthei ha ka jingïalang kaba la pynlong ha ka 10 tarik u Jylliew, 2025, ka la pynpaw ïa ka jingsngewkhia halor ka jingshah pynïap dang shen jong u Raja Rajhuvanshi, u tnga jong ka Sonam Rajhuvanshi, kiba dei ki arngut ki shikurim na Indore, Madhya Pradesh kiba la wan kai ‘Honeymoon’ sha Meghalaya ha ka 21 tarik Jymmang, 2025.
Ha u kyrwoh bala phah da ka President, ka Kong T. Phanbuh, kala ong ba ka dei ha ka 2 tarik Jylliew, 2025 la lap ïa ka metïap jong u Raja Raghuvanshi na riat Weisawdong hynrei khlem shym la lap dak eiei pat haba ïadei bad ka Sonam, bad ka dei ha katei ka por ba ki rynsan social media, ki lad pathai khubor jong ka ri bad ki riew shimet ha kylleng ka Jylla ki la sdang ban kynthoh bad kren pyrshah ïa ki paidbah ka Jylla Meghalaya da ki jingkren beiñ baroh bad kane kala pynsniewdur ïa ka dur jong ka Jylla kaba itynnad bad kaba suk bad kane ka la ktah bad pynmong ruh ïa ki jingsngew jong ki paidbah ka Jylla.
Ka Lympung Ki Seng Kynthei ka la pynrem jur ïa kine ki briew, ki rynsan social media, ki lad pathai khubor jong ka ri bad ki riew shimet kiba la pynleit jingmut ha ka ban pynjah burom ïa ka dur jong ka jylla bad ïa ki briew bad kumta kila hap ban panmap na ki paidbah ka jylla.
Ki kynhun ïarap ba la ïalam da ki pulit ka jylla ha ryngkat ka NRDF, SRDF, ka West Jaintia District Adventurer Mountaineering Club, ki nongshong shnong, ki nongïalam lynti ne ki ‘tourist guide’ bad kiwei-kiwei kiba don ryngkat ha ka jingpyrshang jong ki kaba khraw ki la lah ban wad ïa ka met jong u Raja.
“Ha kaba ïadei bad kane ngi kwah ban pynpaw ka jingkhublei bad jingsngewnguh jong ngi ïa kine ki kynhun bad kumjuh ruh ïa ki pulit kiba la lah ban ïoh ïaka jingshisha tang ha ki khyndiat sngi halor kane ka jingjia. Khublei ïa baroh bad khublei ïa ka kynhun pulit jong ngi”, ong ka Kong Phanbuh.
Da kaba pynpaw ruh ba ka Soonam lem bad ki sawngut ki paralok jong ka kiba la donkti ha ka ban pynïap ïa u Raja, ki dei ban shah pynshitom tyngeh katkum ki kyndon jong ka aiñ jong ka Ri.
Ka Seng ka pynpaw ruh ïa ka jingsngewlem sha ki bahaïing hasem jong u Raja Raghuvanshi da kaba pynpaw ruh ba kum ki kmie ki sngewthuh ïa ka jingshitom bad jingjynjar ba ki kmie ki kpa jong u Raja ki la hap ban ïaid lyngba ha ka jingduh noh ïa u khun baieit jong ki.
