Shillong, Jylliew 12
Hadien ka jingjia jah rngai jong ki arngut ki shikurim ka la mih ka jingkynthoh bad ka jingshah kren beiñ kaba tohmet bha ïa ka Jylla khamtam ïa ka thaiñ Sohra hynrei ym katta ka la mih ruh ka jingshah kren tohmet jong ki riewngeit kiba dei na ka ñiam Seng Khasi ha kaba uwei u briew ula pynmih ïa ka jingthoh ha ka rynsan ‘Facebook’ uba la ong ba napdeng ki Khasi, ka Seng Khasi ka dei kaba shyrkhei tam na baroh.
Utei u briew uba la thoh ïa katei ka jingthoh ha ‘Facebook’ u dei ïa uba la ai kyrteng kum u Ankur Deka, uba la ong ba ka Seng Khasi ha ka rukom tynrai ki duwai ïa u blei bseiñ bad ki ai snam ban pynsngewbha ia ka blei bad ula ong ba mynshuwa ki ju kñia ïa ki briew bad mynta ki kñia ïa u syiar. Utei u briew ula ong ba haduh kine ki sngi ki dang don ki jingjia ha lynti ha kaba la pynïap ïa ki briew kaba la shim ba ka dei ka jingknia kaba khraw tam na baroh bad ong ruh ba kitei ki arngut ki shikurim ki lah ban ngat ha ka jingma ha kum kine ki briew kiba biej kiba sahdien bad kiba shyrkhei.
Ula ong ruh ba kaba phylla ka long ba ym don ki seng imlang sahlang kum ka Khasi Student Union, ka Seng Kynthei Khasi lane ka Dorbar Shnong ban mih paidbah ban pynrem ïa kum kine ki jingjia ba shyrkhei da kaba bynrap ruh ba ka jingsngap jar jong ki, ka wanrah ïa ka jingsuba ïa ka akor ha ka imlang sahlang bad ka jinglong ba janai jong ki.
Haba ïoh ban ïakren bad U Nongsaiñ Hima, na ka liang u Bah Daoowhi Suiam, Publicity Secreratary ka Seng Khasi Sengkmie, ula ong ba ka dei ha ka 7 tarik tarik u bnai Jylliew, 2025 kiba dang dei ha ki sngi ba ka jingwad ïa ka Sonam Raghuvanshi ka dang ïaid shakhmat ha ki bynta ka thaiñ Sohra, ki la ïohi ïa katei ka jingthoh ba la thoh da u Ankur Deka ha ‘Facebook’.
Ula ong ba katei ka jingthoh jong utei u briew ka thew beit ba ki briew na ka ñiam Khasi ki dei kiba donkti ban pynïap ïa ki arngut ki shikurim, bad kane ka la ktah matïong shikatdei eh ïa ka Seng Khasi baroh kawei kaba la pynlong pat ïa ka Seng Khasi ban ujor noh shisyndon da ka ejahar pyrshah ïa utei u briew ha ka 10 tarik u Jylliew, 2025. ”Kam long ba ngin shu sngap jar, ngi hap ban shim ïa kano-kano ka sienjam, kumta ngim banse ba ha ka 10 tarik u Jylliew, ngi la leit ban ujor noh da ka ejahar ha Thanat Sadar”, ong u Bah Suïam.
Da kaba kyrmen skhem ruh ba ki bor Pulit kin sa shimkhia ban leh eiei halor jong utei u briew uba la kren tohmet ïa ka Seng Khasi khnang ba ki briew kiba nabar kin nym nud ban shuh ban kynthoh kumne nangne shakhmat bad ong ruh ba ka jingleh jong une u briew ka long kum ka jingaibih ban wanrah ïa ka jingïapher jingmut hapdeng ki Khasi.
“Ngi don ka jingkyrmen ba na ka liang ka Tnad Pulit kin lap ïa une u briew bad kin kem ïa u khnang ba kane kan long kum ka jingsneng ruh ba ki briew nabar ba kin shu wan ban kynthoh da kumne kumtei”, ong u Bah Suïam.
Shuh shuh, u Bah Suïam ula ong ruh ba kum ki briew ki dei ban kiar na kum kine ki jingkynthoh ïa ka jingngeit bad ka ñiam jong kiwei hynrei ki dei ban ieid ïala ka jong bad ban burom pat ïa jong kiwei.
“Ngi dei ki briew bad ngi lah ban ïapher tang haka jingngeit”, bynrap u Bah Suïam.
Haka jinglap noh ïa ki jingshisha halor ka jingshah pynïap jong u Raja Raghuvanshi ïa kaba la donkti da ka kurim jong u, ka Sonam Raghuvanshi lem bad 4 ngut ki paralok jong ka, u Bah Suïam ula ong ba u dap da ka jingsngewkmen ba ki paidbah bad ka Jylla kila lait na kum kine ki jingshah pynbudnam da kaba ai jingïaroh ruh ïa ki Pulit ka Jylla kiba la trei borbah tad haduh ban lap ksai ïa ki jingshisha.
