Shillong, Jylliew 13
Ki nongtrei kiba don kumba 27 ngut ei ei ha ki Tnat treikam bapher-bapher jong ka Khasi Hills Autonomous District Council (KHADC) kiba la shah weng noh na ka kam ‘Permanent’ bad ba la pynkynriah biang ïa ki kum ki nongtrei ‘Casual’ jong KHADC ki la leit ban ïakynduh ïa u Secretary sha ka Executive Committee jong ka Council, u Bah D.G Syiemïong bad ki la aiti ha u da ka hukum jong ka Ïingbishar kaba la pynksan ïa ki ba ki dei ban neh biang ha ka kam kata kum ki nongtrei Permanent.
Kum ban shu kdew hangne ba ha ka sngi ba-ar jong ka 3 tarik Jylliew, 2025, ka Executive Committee (EC) ka KHADC ka la shim ïa ka rai ban buh noh ïa kitei ki 26 ngut ki nongtrei tang kum ki nongtrei ‘Casual’ wat hadien ka jingthungkam pura (regularised) ïa ki ha ki snem ba la dep bad ban beh kam noh ruh ïa ki katto-katne ngut ki nongtrei. Ka Ïingbishar jong ka Meghalaya High Court ka la pynsangeh noh ïa ka jingtreikam jong ka Office Order No.349 jong ka 30.05.2025, kaba la pynmih da ka Executive Committee jong ka Khasi Hills Autonomous District Council (KHADC), kaba la weng noh ïa ka jingtrei bapura jong ki nongtrei bad pynhap biang ïa ki sha ka kyrdan ‘Casual’
Ïa katei ka hukum la pynmih ha ka 12 tarik u bnai Jylliew ha ka por ba dang bishar ïa ka MC(WPC) No.119 jong u snem 2025 ha ka WP(C) No.234 jong u snem 2025 hapdeng ka Holeena Suting bad ka Khasi Hills Autonomous District Council & ki 2 ngut kiwei pat, ha ka iingbishar jong u B. Bhattacharjee.
Ha ka jingïakren bad uwei na kitei ki samla kiba la shah pynhap kyrdan, u Bah Jied Blah ula ïathuh ba kin sdang ban wan trei noh ïa ka kam naduh ka lah sngi U Blei jong ka taïew ban wan da kaba kyrmen ba u Secretary un leh ïa kaba donkam.
U Bah Jied ula ong ba hadien ka jingleit ban leit ud sha ka Ïingbishar jong ka Meghalaya High Court, ki la ïoh ïa ka jubab ba kin ïoh biang ban long kum ki nongtrei bapura ha ka kam ba ki la ju trei hapoh ka District Council. U Bah Blah ula ong naka liang u Secretary ruh ula soi ïa katei ka hukum da kaba suk bad ula pdiang ruh ïa ka.
“Ngi pynpaw ka jingsngewnguh kaba khraw ïa u Secretary ba u sngewthuh ïa ngi kum ki samla ba ngi don ha ka jingeh bad ka jingjynjar”, ong u Bah Jied.
Shuh shuh, u Bah Jied ula ong ba u ngeit skhem ba kumba kitei ki 27 ngut kila shah pynskhem biang ban long kum ki nongtrei bapura, u kwah ruh ba kiwei kiba la shah wengkam napoh ka Council kin ïoh biang ïa ka hok jong ki.
