Shillong, Jylliew 13
Hadien ka jingmih kynsan ki dkhot ka Confederation of Meghalaya Social Organisation (CoMSO), ban iakhih hakhmat ka khyrdop jong ka Secretariat, Shillong, mynne ka sngi ka 13 tarik u Jylliew 2025, ka District Magistrate ka East Khasi Hills District, ka kong Rosetta Mary Kurbah, IAS, ka la pynmih jingmana halor ka jingshem ba ki Seng bapher bapher ki ju pynlong ïa ka jingiakhih, jingïaid paidbah ha ka District na ka por sha ka por.
Na ka liang ka District Magistrate, ka la ong ba lada shah ïa kum kine ki jingiakhih kan wanrah ïa ka jingthud, pynthud ïa ka lynti ïaid ki kali bad ïalam ruh sha ka jingbun paid shaba palat bad sha ka jingkhapniah bad kan pynthud ruh ïa ka shongsuk shongsngain.
Namar kata, na ka liang ka District Magistrate, East Khasi Hills District, Shillong, katkum ka bor ba la ai hapoh Section 163 BNSS, ka la pynbna ban khanglad bad ym shah ïa kino kino ki briew ne kynhun ban pynlong jingïakhih ne jingia ïaid paidbah hapoh 200 metre na ka lynti ba dei ïaid sha Meghalaya Secretariat building, Additional Secretariat building bad Raj Bhavan, Shillong.
Bad yn ym shah ban kit ne rah ïa ki tiar kiba lah ban pynmih jingmynsaw ïa kiwei pat ki briew.
La mana ruh ba kino kino kiba pynkheiñ ïa kine ki hukum kan wanrah ka jingshah pynshitom katkum ka Section 223 jong ka BNSS bad kiwei pat ki kyndon aiñ ba la buh.
Ïa kane ka hukum la pyntreikam mardor tad haduh ban da pynbna da kumwei pat.
