Jowai, Jylliew 13
Ka North Liberty Higher Secondary School bad Govt. Boy’s Higher Secondary School, Jowai kin mihkhmat ïa ka West Jaintia Hills District katba ka Musniang Secondary School, Wapung Higher Secondary School bad Lotus Secondary School, Deinshynrum kin mihkhmat ïa ka East Jaintia Hills District ha ka lympung ïalehkai State Level Inter School Subroto Mukherjee Cup Football Tournament ha Shillong.
Kane ka la wan hadien ba kine ki skul ki la khur jingjop ha ka jingïakhun final jong ka lympung ïalehkai District Level Inter School Subroto Mukherjee Cup Football Tournament bala pynïaid da ka ophis District Sports Officer jong ka West Jaintia Hills bad East Jaintia Hills District ha ka 13 tarik Jylliew.
Ha West Jaintia Hills District ïa ka jingïakhun phainal la pynlong ha madan Kiang Nangbah Stadium la wan ban sakhi lang da u MLA ka Jowai Ma Wailadmiki Shylla, Chairman MUDA kum u kongsan.
U Ma Wailadmiki Shylla ha ka jingkren ula ai mynsiem ïa ki khynnah skul khamtam kiba ïoh ban khur ïa ka nam lahduh jong kane ka jingïakop, ula kular ruh ba lada don ki skul kiba ïoh ban mihkhmat napoh ka District sha ka National Level na ka liang jong u, un ïarap shi-lak tyngka.
Ha kaba ïadei bad ka jingpynbha pynmiat ïa ka Kiang Nangbah Stadium na ka bynta ka National Games, ula pyntip ba na ka liang ka sorkar kan leh noh ïa kaba donkam ha kine ki khyndiat ban wan bad ula pyntip ruh ba ka sorkar kala buh thong ban tei sa kawei ka madan Artifial Turf ha shnong Mukhla.
Haba phai sha ka jingïalehkai jong ka kyrdan Under-17 na ka liang ki kynthei ka North Liberty Hr. Secondary School, Jowai ka la pynliem ïa ka Kiang Nangbah Hr. Secondary School, Jowai da 2-0 kol. Katba ha ka liang ki shynrang ruh ka North Liberty Hr. Secondary School, Jowai kala jop da 1-0 kol ïa ka Marian Hill Hr. Secondary School, Jowai.
Haka kyrdan Under 15 Boys Govt. Boy’s Hr. Secondary School, Jowai ka la pynrem ïa ka St. Dominic Hr. Secondary School da 3-2 kol lyngba ka jingïashut Tie-Breaker.
Ïa ki khusnam sha ki nongjop la sam da u Ma Jame Sutnga, President EJHDSA, Alan Niangti, President WJHDKDA, Patrick Lamare, Vice-President, WJDSA, Kmenlang Shylla, President Thadlaskein Sports Association, EMH Passah, Working President WJDSA bad Khroobok Passah, Jt. Director Directorate of Sports & Youth Affairs, Govt. of Meghalaya.
Ha East Jaintia Hills ïa ka jingïakhun phainal la pynlong ha madan phutbol ha Diengshynrum ha ka jingdonlang ka kongsan ka Kong Violet Lyngdoh MDC ka thain, u Additional Superintendent of Police, East Jaintia Hills District Ma S. Paslein, District Sports Officer, East Jaintia Hills District ka Kong Stephanie M. Rasang, nalor ki nonghikai bad kiwei-kiwei.
Haba phai sha ka jingiakhun jong ka kyrdan Under-15 Boys ka Musniang Secondary School emerged ka la long ka lahduh da kaba pynrem da 3-0 kol ïa ka KB Memorial Secondary School, Wapung. Ha ka Under-17 Boys, ka Wapung Higher Secondary School ka la pynrem ïa ka Sein Jait Tuber Higher Secondary School da 4-0 kol katba ha ka Under-17 Girls ka Lotus Secondary School, Deinshynrum ka la jop da 2-0 kol lyngba ka tie breaker pyrshah ïa ka Sanshnong Secondary School.
Hadien ka jingïalehkai la sam ïa ka khusnam Best Player sha u Everlasting Dkhar jong ka Musniang Secondary School u la shah jied kum u rangïalehkai ba tbit tam haka kyrdan Under-15 Boys. Katba u Daemitre Rymbai na Sein Jait Tuber Higher Secondary School bad Thehlut Sana na Sanshnong Secondary School ki la ïoh khur ïa ka nam Best Players ha ka kyrdan Under-17 Boys bad Under-17 Girls.
