Vancouver, Jylliew:
Katkum ki khubor, la ong ba ki paidbah nongshong shnong ba han jong ka Vancouver, ha ka Sngi Balang ki la shah pynkynriah jaka noh namar ka jingkem ding jong ki katto katne ki bynta jong katei ka ri Canada.
Ki bor pyniaid katei ka nongbah ki la pynmih ruh da ka jingpynbna ba kyrkieh hapoh Squamish bad British Columbia, kumba 64 Kilometre na ka phang North jong ka Vancouver, ka nongbah kaba do ia kumba 3 Million tam ki paidbah nongshong shnong.
Kumjuh ruh ki bor pyniaid ka Columbia, ha ka Sngi Ba-ar ki la maham lypa ba ki nongshong shnong jong ka thaiñ Squamish ki hap ban long kiba pynkhreh ban mih noh na ka shnong ba ki ju shong namar ka jingma kaba ap ia ki ha kane ka por.
Uwei u khynnah samla na ka thaiñ Squamish, haba iakren bad ki lad pathai khubor, u la pynpaw ia ka jingkyndit kaba khraw haba u iohi ba ka ding ka la kloi ban pur bad ban poi shaduh shajan katei ka thaiñ.
Namarkata, la ong ba ki paidbah kim banse ban khung ia ki jingdonkam jongki bad ki jingdon- jingem kiba kham kongsan naba kin hap ban mih noh shwa na katei ka thaiñ katba ka ding ka dang neh.
Namar la ong ba tang hadien 2 snem ba ka Canada ka la ioh mad ia ka lyiur kaba shyrkhei, katei ka ri ka la ïakynduh biang ia katei ka jingeh jong ka jingpluh ding ha kane ka por, ha kaba ki jaka ba la kem ding ki la palat lypa ïa ka jingkheiñ jingdiah naduh ki snem ba la dep.
La ong ba ka tdem kaba mih na ka jingkem ding kitei ki bynta jong ka ri Canada, ka la leit poi sha Europe, hadien ba ka la her sha shiliang jong ka duriaw bah Atlantic.
