Shillong, Jylliew 13
Watla ka Sonam Raghuvanshi ka la dep pynkhreh lypa bad ki lai ngut ki paralok u Raj Kushwaha ban pynïap ïa u Raja Raghuvanshi uba dei u kurim hynrei haba ka leit sah bad u ha Shipara Homestay ka la leh ïeid bha ia u Raja.
Kane ka jingpyni jingïeid ka Sonam ia u Raja ka dei ba la ïathuh da u trai ka Shipara Homestay ha Nongriat, Bah Constantine Rynga ha ka jingïakynduh bad U Nongsaiñ Hima uba la mih na Shillong ban ïaid kjat naduh Mawlakhiat, Pyndemdkhar ban poi sha Nongriat.
Watla hapdeng ka jingshit ka sngi bad hiar ia u thieb uba jrong, hynrei U Nongsain Hima u la poi beit sha Nongriat ban leit lum jingtip ïa ka jingïaid lynti ka Sonam bad u Raja.
Kane ka jinghiar sha Nongriat ka long hadien ba ka Sonam, u Raj uba dei u samla ka Sonam ryngkat ki lai ngut ki paralok u Raj kata u Vishal Chauhan, Akash Rajput bad Anand Kurmi ki la shah kem ha ki pulit ka Meghalaya kiba la phla ba ki la thmu ban pynïap ïa u Raja sha Nongriat hynrei namar bym ïoh jaka ban bret ïa ka metiap ki la sangeh noh ïa kane ka jingpynkhreh.
Haba ïoh ban iakren bad u Bah Constantine Rnga u la ïathuh haba kine ki shi kurim ki la wan sah ha ka register la soi kyrteng tang u Raja bad haba ki la rung ha kamra ki la phah shet coffee.
“Hadien ba ki la dep dih coffee ki la leitkai pyngngad sha jingkieng jri bad ki wanphai biang sha kamra” u la ong.
U la iathuh ba kine ar ngut ki la bamja ha ka por 8:30 janmiet bad ha ka por 5:30 mynstep ki la mih ban leit phai noh.
U la pynpaw ba lada kine ki lai ngut ki shynrang ryngkat ka jingiasylla bad ka Sonam ki la pynïap ia u Raja sha Nongriat ka jingkynnoh kan dei ïa ka shnong bad ïa u namar u dei u trai ka jaka sah.
Ha kane ka sngi u nonglum khubor u la leit ban ïakynduh ïa u trai ka Serene Homestay ha Nongriat kaba dei ka jaka ba sah ki lai ngut ki shynrang kiba la dep ïasylla bad ka Sonam hynrei khlem ïoh iakynduh markhmat namar u la leit aiti ia ka register sha ki pulit ka Sohra Police Station.
Haba ïoh ban pynthikna ïa kiba ap ha kane ka jaka sah ki la ïathuh ba kine ki lai ngut ki la wan sah ha ka 22 tarik Jymmang 2025 bad ki la mih ruh ha ka por mynstep.
