Shillong, Jylliew 13
Ka Khun Hynñiewtrep Awakening National Movement (KHNAM) ha ka 11 tarik u Jylliew 2025, ka la leit ban buh da ka dorkhas sha u Myntri ka tnat Pohïing, Bah Prestone Tynsong halor ban dawa pyntreikam ïa ka Inner Line Permit (ILP) ha ka Jylla.
Ha ka kyrwoh ba la phah da ka seng lyngba u Working President, Bah Thomas Pasah u la ong ba ka Ïingdorbar thaw aiñ ka Jylla ka la mynjur da kawei ka sur ïa ka rai ban pyntreikam ïa ka Inner Line Permit (hadien yn khot ILP) ha ka Jylla ha u snem 2019, ïa kajuh la phah sha ka tnad kam pohïing jong ka ri India ban ïoh jingmynjur ba kajuh ka dang sahteng haduh kine ki sngi.
Ka don ka jingsngewthuh bakla ba lada pyntreikam ïa ka ILP ha ka Jylla Meghalaya kan khanglad ïa ki briew ban wan jngohkai ïa ka Jylla, hynrei ka seng ka kwah ban pynpaw ba ka jingdawa ILP kam dei ban khang lad ïa ki briew ban rung shapoh ka Jylla hynrei ban pynsuk ïa ka jingwan rung jong ki sha ka Jylla.
‘Nga ngeit skhem ba hadien ba la pyntreikam ïa ka ILP ha ka Jylla yn pynlong mandatory ïa ka jingpynrung kyrteng ïa ki nongwan jngohkai, kaban pynlah ïa ka atiar ka jylla, ban bud ryntih, ban pynthikna ïa ka jingshngaiñ jong ngi ki nong India bad ban ïada ïa ki kam sniew ha ka Jylla Meghalaya,” ong u Bah Thomas ha ka kyrwoh.
U la ong ruh ba ka jingjia kaba dang shen jong ar ngut ha Indore, Madhya Pradesh ka dei kawei na kum kine ki nuksa. Lada ka ILP ka la don ha ka Jylla jong ngi, ngi thikna ba ki briew kiba don ka jingthmu kaba sniew kin ym nud ban pynrung kyrteng ïalade bad ban rung shapoh ka Jylla.
Ha ki social media wat, u nongjngohkai pyrthei u la kren shai ba ka don ka jingbthah ban pynrung kyrteng ïa ki briew shimet kiba rung shapoh ka Jylla na ka bynta ka jingshngaiñ jong u nongshong shnong jong ngi baroh kawei.
U Bah Passah u la ong ba ka don ka jingmut bakla, ba kan long ka jingeh ïa kito kiba thmu ban rung shapoh ka Jylla, hynrei ngi kwah ban pynpaw ba da ka jingpynmih ïa ka Digital India da u Myntri Rangbahduh ba donburom jong ngi, kan pynthikna ïa ka jinglong kaba suk, kaba stet bad kaba suk ïa ki nongshong shnong ban apply/pynthymmai/pynjlan ïa ka jingbit ha kano-kano ka por bad ka sorkar jong ka ri India ka lah ban bthah ïa ka Sorkar Jylla ba kan pynthikna ba kan ym don kano kano ka jingthut ïa u nongshong shnong. Ka la don ka jingsngewthuh bakla ba ka lah ban pynthut ïa ki Samla Pule kiba pule, ïa ki Nongtrei Sorkar Pdeng, ïa ki Nongjngohkai pyrthei, ïa kiba ïaid lyngba ka Jylla lada wan ka ILP, hynrei ka seng ka la pynpaw ba ka jingpynbiang ïa ka Student Permit, ka Central Govt Employee Permit, ka Tourist Permit lane ka Transiting Permit ka lah ban pynthikna ba kan ym don kano kano ka jingpyndik ïano ïano ruh, u la bynrap
Kumta ka seng ka la kyrpad ïa u Bah Prestone sngewbha ban shim ïa ka sienjam kaba donkam ban pyntreikam ïa ka ILP ha ka Jylla Meghalaya, khnang ban pynthikna ïa ka jingshngaiñ bad ban pynthikna ïa ka jingsuk ïa baroh kiba wan rung sha ka Jylla.
