Shillong Jylliew 13:
Ka Confederation of Meghalaya Social Organisation (CoMSO) ha ka 13 tarik u Jylliew 2025 ka la leit tur kynsan kynsan hakhmat ka khyrdop Secretariat ban dawa biang na ka sorkar Jylla ban pyntreikam noh ïa ka Inner Line Permit (ILP) hapoh ka Jylla.
Ha kane ka sngi ki la don palat kumba 200 ngut tam eiei ki dkhot ka seng ki ba la wan ban tur kynsan ha Secretariat ban dawa na ka sorkar Jylla ka ba dei ruh ka sorkar ba kyrshan ïa ka sorkar NDA ba kadei ban pyntreikam noh ïa ka Inner Line Permit (ILP).
Ha ki plakad ba ka seng ka la rah hynne ka sngi la thoh No ILP,No Rest,namar bym don ILP shah shoh ki pulit KHADC ha ki mynder bad ruh la paw ka jingthoh ka ba ong “Namar bym don ILP wan pynïap lok ka Sonam ha ri lum Khasi”.
Ha kapor ba ka CoMSO ka la poi ha katei ka jaka ki la shong kyllaiñ mungor hakhmat ka khyrdop Secretariat ha ryngkat ka jingpyrta jam da ka sur ka ba ong, “No ILP,No Rest.” Hapdeng ka jingshong kyllaiñ mungor ka seng la wan ki bor pulit ban pynkynriah na surok namar ka la pynsahkut lut ïa ki kali ba leit ba wan baroh.
Ha kapor ba ki bor pulit ki la pynkynriah ïa ki dkhot ka seng na katei ka jaka ban shong kham sha jngai namar ka la pynsahkut lut ïa ki kali ba leit ba wan, la ïoh sngew ia ka sur jong ka seng da kaba pyrta, “Ngi dawa ILP bad No ILP No Rest.
Ka jingleit tur ka CoMSO ha Secretariat kam shem la pynkmen ïa ki bor ba halor, ka ba la pynlong ïa ki Magistrate ban leit ïakren ïa ki nongïalam ka seng ban kyrpad ba kin sngewbha ban kynriah noh na kane ka jaka iakhih namar ka la pynthud ïa ka leit la wan jong u ba bun ba lang.
Ha kane ka sngi la ïohi ïa ka jingdon ki Magistrate ki bor pulit bad hashwa ba ki officer sorkar kin leit ïakren ïa ki nongïalam ka CoMSO ha kapor ba ki dang pyrta da ka sur ka ba jam No ILP No Rest, u Myntri Rangbah ka Jylla u Conrad K Sangma ryngkat u bah Prestone Tynsong bad u bah Sniawbhalang Dhar ba ki la wan iaid na katei ka khyrdop Secretariat katba ka seng ka la pynlong ïa ka jingïakhih.
La sakhi ruh ba ha kapor ba kine ki kali Myntri sorkar ki dsngwan iaid na katei ka jaka ka la pynlong ïa ka seng ban dangiai pyrta jam ïa ka sur No ILP No Rest khnang ba kitei ki heh sorkar kin ïoh sngew ïa ka jingdawa jong ki.
“Mar ïa leit ki kali jong ki Myntri sorkar na ka liang ki bor district ka East Khasi Hills bad ki bot pulit ki la leit ban ïakren ïa ki nongïalam ka CoMSO bad ha katei ka jingïakren ka la mih ka jingiañia ka bajur bha hapdeng ki nongïalam ka seng bad ki bor District, ka ba la pynlong ïa u Chairman ka CoMSO u bah Roykupar Synrem ban ong ba da ka jingwan jongki kalong ban pynkriah jubor, hynrei u Conrad un leh aiu lada wan shong surok da ki paidbah namar ka jingdawa ILP kadei ka jingdawa jong ki paidbah”.
Hapdeng ka jingiakren ki nongïalam ka seng ki la ong ba “ngim kwag ïa ka jingpynlulmar hynrei lada jin ba kam sorkar Jylla ka la ai jingthoh iangi ban ïakynduh, ngi lah ïoh ban iashong ban ïa kren katba ka sorkar Jylla haduh mynta ruh kam pat leh eiei.”
U Magistrate u la kyrpad ïa ki dkhot ka seng ban kynriah noh na katei ka jaka, da kaba bynrap ban sngewbha ban ailad lem ïa paidbah ba leit ba wan namar ka la pynthud, katba ka seng pat ka la ong ba ngi ailad ïa ki paidbah bad ngim shem la pynthud hi ruh ïa ki paidbah ba leit ba wan.
Shuh shuh ka seng ka la ong jin lada ka sorkar ka trei na bynta u paidbah naduh mynno ka ILP ka la treikam hapoh ka Jylla.
Haba bynrap biang na ka liang u bah Roykupar Synrem u la ong ba kane ka jingdawa kam dei tang ka jingdawa jong ka seng hynrei kadei ka jingdawa jong ki paidbah da ka ba u la byrngem ruh ba kan sa don ka sngi ba ka seng kan sa khot ïa ki paidbah ban iamih ban iakhih ha Secretariat.
Kumta hadien katto katne por eiei ka seng ka la sangeh noh ïa ka jingïakhih ha ka khyrdop Secretariat.
