Shillong, Jylliew 13
Ka Kynhun Myntri ka Sorkar Jylla ha ka Sngi Thohdieng ka la mynjur ban wanrah ïa ka Chief Minister’s Regional Connectivity Scheme, 2025 (CMRCS) ban pynïasoh ïa ki distrik ‘Headquarter’ sha ki Block ‘Headquarter’ bad jong ka thaiñ kumjuh (Regional Headquarter).
“Kaei kaba ngi la rai ka long ban wanrah ïa ka Chief Minister’s Regional Connectivity Scheme, 2025,” ong u Myntri ka Sorkar Jylla, Bah Paul Lyngdoh haba kren sha ki lad pathai khubor hadien ka jingïalang ka Kynhun Myntri.
U la ong ba kane ka skhim kan pynïasoh ïa ki distrik ‘Headquarter’ sha ki Block ‘Headquarter’ bad jong ka thaiñ kumjuh.
“Kumba 90 tylli ki bos yn sa wanrah bad ka jingthmu ka long ban ai mynsiem ïa ki nongseng kam. Kawei na ki mat ba hakhmat eh jong kane ka skhim ka long ban pyntikna ba kine ki bos ki poi sha ki distrik ‘Headquarter’ hapoh ka por 9:30 baje mynstep bad ban mih hapoh 5:30 baje janmiet ban pynbiang ïa ka jingdawa jong ki nongleit ophis, khynnah skul, ki nongpang ba leit sha ki jaka sumar bad kiba leit ba wan sha ki jaka ïew,” u la ong.
U Myntri u la ong ruh ba ka jingkyrshan pisa kan kiew sha ka 50% na ka dor jong ka kali bad kan don ruh ka jingsynñiang na ka Sorkar kaba 35% na bynta ka ‘On Road Cost’ kum ka ‘Down Payment’.
“Ki nongïoh jingmyntoi kin synñiang 5% jong ka ‘Down Payment’ bad ka ‘Loan Financing’ kan poi sha ka 60% kaba hap ban siew hapoh 5 snem da ki nongïoh jingmyntoi,” u la ong.
U la kdew ruh ba la pynithuh ïa ki lynti ïaid ki ban kynthup ïa ki Block bad distrik ‘Headquarter’ bapher-bapher kumjuh ki ‘Headquarter’ jong ka thaiñ.
“Kane ka dei ka sienjam kaba kongsan kaba ngi kyrmen skhem ba kan khmih ïa ka jingduna kaba heh kaba ngi don mynta bad ban pynbha ïa ka leit ka wan sha ka thaiñ,” ong u Myntri da kaba bynrap ba kane ka dei ka jingduna kaba khraw hapoh ka tnad Transport kumba ka long mynta bad da ka jingwan jong kine ki 90 tylli ki bos, ka Sorkar ka kyrmen skhem ba yn sa weng ïa kine ki jingeh.
Haba kylli, u Bah Lyngdoh u la ong, “Kane kan pynshlur ha ka ban pyndonkam ïa ki bos ka ban ïarap pat haba phai sha ka jingktah jong ka jingdheng kali ha ki surok.”
