New York, Jylliew:
Kawei ka longkmie bad u kurim na US, ki la shah kem noh hadien ba la ong ba ki la shong beiñ ia ka khun kynthei jongki, kaba dang 3 snem ka rta haduh ba kan da iap syndon. Katkum ka khubor na New York, la ong ba ka Jamie Johnson, 44 snem bad u Raymond Johnson, 62 snem ka rta, kiba dei shnong trai na North Dakota, la ong ba ki la pynshitom dusmon ia katei ka khyllung 3 snem da kaba kura, kynjat, ki la sangah ruh ia ka khlieh jongka kat ha kaba ka don bad kiwei de ki rukom pynshitom beiñ kiba long be-aiñ haduh katta, ha kaba katei ka khyllung ka dei kaba dang shu leit sah badki dang kumba katto- katne bnai. La ong ba katei ka khyllung ka ju shah shoh beiñ ha kitei ki shi kurim tang namar ba ka dei ka khynnah kaba jem mynsiem bad kaba kloi ban iam bad ka ju shah shoh bha ha ka por bam namar ba ka kham slem bad kham shimpor ban dep bam.
Kawei ka khun ruid jong katei ka briew ka la iathuh ba ka ju iohi ba ba katei ka briew ka ju bitar haduh katta ia ka rukom bam jingbam jong katei ka khyllung namar ba ka shim por palat ban dep.
Ha kawei pat ka jingphla jong katei ka briew, ka la pynpaw ba imat katei ka khyllung ka don ki jinglong kiba kham pher bad kiba ma ka bad u kurim jongka, kim lah shah ban peit.
La ong ba ha u Lber jong une hi u snem, kitei ki shi kurim ki la leit kit ia katei ka khynnah ka bym shym la tip briew shuh, sha kawei ka jakasumar. Ha kaba, kitei ki shi kurim ki iathuh ba katei ka khynnah ka shu ur bad hap hi da lade na ki markyndon ha ki khyndiat sngi ba la leit.
Katei ka longkmie ka iathuh ruh ha ki pulit ba shim jingtohkit ia ka, ba katei ka khyllung ka ju leh ia kiei- kiei ki ban pynmynsaw hi ialade namar ka jinglong suki palat jongka ban shemphang ia kiei- kiei baroh ha ka jingim bad ka jinglong- jingman jongka bad kumta ruh ka ju ur- ju hap bad ka ju leh shibun kiwei ki jingbakla kiba da lade hi ka kum pynmynsaw ialade namar ka jingbym sngewthuh jongka.
Katba, ki pulit ka tnat tohkit pat ki la ioh ia ka video ba la ioh ring lyngba ka CCTV na ka iingsah jongki hi, ha kaba la iohi ia ka Jamie ba ka kura ia katei ka khynnah rit na ki bynta jong ka khlieh bad ka tan ruh ia katei ka khynnah na u shñiuh khlieh, kaba la pynlong ia katei ka khynnah ba kan tyngkhuh ia ka kynroh bad ka madan jong katei ka iing. La iohi ruh ba katei ka longkmie ka la tied ia katei ka khyllung da ka siang dieng na khlieh, na ka dur khmat bad na ki bynta jong ka kpoh bad ka set pat ia ka shyntur jong katei ka khyllung kan tang shu mut ban iam ne lynñiar namar ka jingpang.
U Raymond Johnson, u kurim jong ka Jamie pat, u dei uba ki khyllung- khynnah ki ju bud bad snoh bha namar ki iohi ia u kum u briew uba bha bad uba sngewtnnad bad uba ieid khyllung. Watla katta, la ong ba kane ka khubor pat ka la pynkyndit ia baroh namar ba u nud wat ban shoh ban tied beiñ ia katei ka khyllung kaba dang 3 snem ka rta.
Kiwei pat ki khynnah rit kiba ju iohi ia ka jingshah leh beiñ jong katei ka khyllung, ki la phla ba ki ju iohi ia u Johnson ba u leh beiñ ia katei ka khyllung, ha kaba u ju shoh, u ju sangah ia ka khlieh jongka kat ha ki kynroh ne ki miej- ki ben kiba ka shong.
Kumta, haba iadei bad kane, ka ïingbishar ka la wad bniah bad phah da ka jingtohkit ba kyrpang ban lap ia ka daw jong ka jingkhlad jong katei ka khyllung bad ki la pynngat ruh ia kitei ki 2 ngut shi kurim hapoh jong ki kyndon pynkheiñ aiñ kiba iadei bad ka jingleh pynkheiñ aiñ bad ka jingleh dusmon jongki pyrshah ia ka khyllung ka bym pat tip ia kaei- kaei ruh.
