Islamabad, Jylliew:
Ka National Center for Seismology (NCS) ha ka Sngi Thohdieng ka la pynti ba u jumai uba 4.6 Magnitude u la pynkhynñiuh ia ka Pakistan ha ka miet Sngi Palei, ha ka jing jylliew kumba 10 Kilometre.
Hynrei la ong ba u jumai u bym da jylliew, u kham don jingma shibun ban ia u jumai uba ngam jylliew. Kane ka long namar ba ki jingkhynñiuh jumai kiba jylliew ki don ka jingjngai kaba kham lyngkot ban leit sha sla khyndew, kaba pynlong ïa ka khyndew ba kan khñiuh jur bha bad kaba lah ban pynjulor ïa ki jingtei bad ka jingjulor ruh kan kham bun.
Ha kajuh ka por, ki nongshong shnong jong ka Peshawar, ki la shah pynkhihwin ha ka jingkhih jong u jumai ha ka Sngi Palei, ha kaba ka jingkhlaiñ jong utei u jumai ka long 4.7 Magnitude.
La ong ba ka phang pdeng ba la shah ktah bad iohsngew bha ia utei u jumai ka dei ha ki bynta jong u Lum Hindu Kush jong ka Afghanistan, ha ka jingjylliew kaba 211 Kilometre.
Watla katta, la ong ba ym shym la ioh jingtip ban don kano- kano ka jingjulor ne jingmynsaw hadien jong utei u jumai haduh jong ka step Sngi Thohdieng ba la pynmih ia kane ka khubor.
Kane ka jingkhynñiuh jumai kaba khatduh eh, ka long hadien shibnai ka jingkhynñiuh jong u jumai uba 5.3 Magnitude, uba la leit lynshop ia ka nongbah Islamabad bad ha ki bynta jong ka Khyber Pakhtunkhwa, kaba kynthup ïa ka Mardan, Swat, Nowshera, Swabi bad ka North Waziristan.
Ha kajuh ka por, ka Geo News ka la pynpaw ba ka nongbah rud nong jong ka Karachi ka la mad haduh 30 tylli ki jingkhynñiuh jumai kiba rit ha kine ki sngi ba ladep.
Ka Pakistan ka long kawei na ki ri kaba ju mad khah- khah ia ki jingkhynñiuh jumai lada ianujor bad kiwei pat ki ri ha ka pyrthei, ha kaba katei ka ri ka la ioh mad ia bun tylli ruh ki jingjulor kiba jur ha ki por ki snem ba la leit.
