Shillong, Jylliew 13
Ka Kynhun Myntri ka Sorkar Jylla ha ka Sngi Thohdieng ka la rai ban pynkhlaiñ shuh-shuh ïa ka Meghalaya Residents Safety & Security Act (MRSSA) khnang ban pyntikna ïa ka jingshong suk shong shngaiñ hapoh ka Jylla.
Ïa kane la ong da u Myntri bad nongaiktien ka Sorkar Jylla, Bah Paul Lyngdoh haba kren sha ki lad pathai khubor hadien ka jingïalang jong ka Kynhun Myntri.
“Ngi la rai ban khmih bniah biang ïa ka MRSSA kaba dei ka aiñ kaba la don lypa jong ka Jylla ban pynbun shuh-shuh ki bniat ha kane ka aiñ hadien jong ka jingjia ha Sohra (jingshah pyn-ïap u Raja Raghuvanshi) bad ban pyntikna ba ngi pynduna ïa ka jinglah ban don jong ki runar kiba wan rung shapoh ka Jylla ha ka dur jong ki nongwan jngoh kai pyrthei,” u la ong.
Haba kren halor ka MRSSA, u Bah Lyngdoh u la ong ba watla ki don shibun kiei-kiei kiba la don lypa ha kane ka aiñ, hynrei u la ban jur halor ka jingdonkam ban kyntiew bad pynbha shuh-shuh ïa kiba la don lypa ha ka aiñ.
“Ngin sa wanrah ïa ki jingtyrwa ba pura halor kane,” u la ong.
U la ong ruh ba ka MRSSA ka dei ka bynta jong ka Jylla halor kaei kaba ka kwah ban leh ban pyntikna ïa ka jingshngaiñ jong baroh ki nongshong shnong jong ka.
“Hynrei kumba nga la ong, ngi kwah ban khmih bniah biang ïa kane ka aiñ ban weng ïa ki jingduna kiba don bad ban pynkhlaiñ (da kaba buh jingmut halor kaei kaba la jia ha Sohra) khnang ba ngi pyntikna ba ngi don ïa ka jinglong-jingman kaba shngaiñ bad ngi ïai bteng ban long kiba ïajan ha ka jingïadei bad kiba shngaiñ ïa ki nongjngoh kai pyrthei,” u la ong. Haba phai sha ka bynta jong ka Inner Line Permit (ILP), u Myntri u la pynkynmaw ba ka Ïingdorbar Thawaiñ ka Jylla ka la dep ban mynjur ïa ka rai, bad ïa mynta, kane ka kam ka dang sahteng bad ka tnad kam pohïing ka Sorkar Pdeng – kaba don shibun ki jingkylli, kiba kum ka Sorkar Jylla ka pyrshang ban shimkhia ïa kine.
Shuh shuh u la bynrap, “Katto-katne na kine ki jingkylli ki don jingïadei bad ka jingshisha ba ka Meghalaya kam dei ka ‘End Point’, ngi pynïasoh ruh ïa kiwei-kiwei ki bynta jong ka Thaiñ Shatei Lam Mihngi kum ka Silchar, bad ka Jylla Mizoram bad Tripura.”
