Shillong, Jylliew 13
Ka Meghalaya Basketball Association (MBA) ka la pynbna ban pynlong ïa ka jingpyrshang (selection trials) na ka bynta ki kynhun ïalehkai basketball (senior) shynrang bad kynthei.
Ka jingthmu jong kane ka long ban pynkhreh ïa ki kynhun ba kynsai ban mihkhmat ïa ka Jylla sha ka 39th National Games ka ban long ha Meghalaya ha u snem 2027. Katkum ka kyrwoh ba la pyllait da u Bah Wallambok Ïawphniaw, General Secretary ka MBA la ong ba ki khynnah kiba lah ban wan sha katei ka prokram jied ki dei kiba 18 snem shaneng bad ki dei ban long ruh ki nongshong shnong ba pura jong ka jylla Meghalaya. Yn bishar thuh ruh lyngba ki jingïashim bynta ha ki lympung ïalehkai basketball hapoh ka Jylla, National bad International.
Ka prokram jied na ka bynta ki kynthei kan long naduh 20 haduh 21 tarik mynta u bnai, katba ïa ki shynrang yn pynlong ha ka 23 bad 25 tarik mynta u bnai bad ka jaka kan dei ha ka nongbah Shillong. Ki nongshim bynta kin hap ban wanrah lang ïa ki kot ki sla ban pynshisha ïa ka snem kha kum ka Aadhaar card lane kino-kino ki ID ba la ïoh na ki tnat sorkar lem bad ka dur passport-size dang shen. Na ka bynta ki jingtip kiba bniah ki khynnah ki lah ban ïakynduh ïa u General Secretary lane phone ha u number 8787387652.
