Shillong, Jylliew 15
Palat 1600 ngut ki kyrtong kiba la ïakhun ïa ka National Eligibility-cum-Entrance Test – NEET(UG) 2025 napoh ka Jylla ki la seisoh ha kane ka eksamin hadien ba ka National Testing Agency (NTA) ka la pynbna ïa ka risol ha ka Sngi Saitjaiñ.
Ha kajuh ka por, ki don 4068 ngut ki kyrtong napoh ka Jylla kiba la pynrung kyrteng bad napdeng kine, 3869 ngut ki la ïakhun ïa ka eksamin bad 1681 ngut ki la seisoh ha ka NEET(UG) 2025, ong ka NTA ha ka kyrwoh khubor.
Haba phai sha u snem 2024, 4009 ngut ki kyrtong ki la pynrung kyrteng bad napdeng kine, 3815 ngut ki la ïakhun ïa ka eksamin bad 1849 ngut ki la seisoh na ka bynta ka NEET (UG) 2024.
Kumba ka long, ka NTA ka la pynlong ïa ka National Eligibility-cum-Entrance Test (UG) – 2025 na bynta palat 22 lak ngut ki kyrtong ha 5468 tylli ki jaka thoh eksam bapher-bapher kiba don ha 552 tylli ki nongbah ha kylleng ka ri bad ha ki 14 tylli ki nongbah shabar ka India ha ka 4 tarik Jymmang, 2025.
Ïa kane ka eksamin la pynlong ha ki 13 tylli ki ktien ba kynthup ïa ka Assamese, Bengali, English, Gujarati, Hindi, Kannada, Malayalam, Marathi, Odia, Punjabi, Tamil, Telugu bad Urdu.
Shuh shuh ïa kane ka eksamin la pynlong ha ki 14 tylli ki nongbah kiba don shabar jong ka Ri kita ha Abu Dhabi, Dubai, Bangkok, Colombo, Doha, Kathmandu, Kuala Lumpur, Kuwait City, Lagos, Manama, Muscat, Riyadh, Sharjah bad Singapore.
