Shillong, Jylliew 15
U Rangbah Shnong ka Khiehshnong Sohra, u Dr. Shembhalang Kharwanlang, u la pynpaw ïa ka jingsngewkhia kaba jur halor ka jingkynnoh ba ka District Medical & Health Office (DMHO) kam shym la lah ban pynneh ïa ka jingïateh ba la ïasoi bad ka shnong ha kaba ïadei bad ka projek Hospital AYUSH.
Haba ïakren bad ki lad pathai khubor, u Dr. Kharwanlang u la pynpaw ba ïa kane ka hospital la lah ban pynurlong lyngba ka jingtrei shitom jong u MLA barim u Bah Titosstarwell Chyne.
Hadien kane, la ïasoi ïa ka jingïateh hapdeng u DMHO bad ka shnong, ha kaba ki paidbah ki la ai jaka da ka mon sngewbha ban shna ïa ka hospital.
Ïa kane la leh da ka jingsngewthuh ba ïa ki lad kamai-khamtam eh ïa ki kam kum ki nongpynkhuid, ki nongsar, ki ward kynthei bad shynrang, bad ki mali-yn ai sha ki nongshong shnong kiba biang.
U la pynshai ba watla ki kam kiba la kdew ki lah ban ym donkam ïa ki jingnang jingstad kiba pura, hynrei la shim ba ki long kiba biang na ka bynta ki nongshong shnong, bad kata ka jingpynthikna ka la long ka nongrim jong ka jingai jaka.
“Ka jingïateh ka la kren shai ba kiba bun na kum kine ki post kin leit sha ki trai shnong kiba lah ban trei ïa ki kam”, ong u Dr. Kharwanlang
U la bynrap ruh ba ha ka por ba la pynbna ban thungkam ha u bnai Rymphang 2024, ki nongïalam shnong ki la aiti ïa ka shithi ban pynkynmaw ïa ka tnat ïa ka jingkular jong ka. Hynrei ynda la pynmih ïa ka resolt, ka la paw ba ym shym la burom ïa ki kyndon. Nangta la phah ïa ka shithi buddien, kaba kdew ïa ka jingbym lah jong ka tnat ban buh kyrpang ym duna ïa ka 70% na ki kam na ka bynta ki nongshong shnong kumba la kular.
“Ngi dang pan jingshai mynta na u DMHO balei la leh klet ïa ka jingïateh”, la ong u Dr. Kharwanlang. “Ngi dang ïaineh ha ka jingïateh kular kaba ngi la ïasoi bad ngi khmih lynti ba ki bor synshar khamtam kito kiba don ha ki kyrdan ba don jingkitkhlieh kin leh ïa kaba dei”.
Ka shnong ka la pynpaw ruh ïa ki jingeh ha ka mariang ha kaba ïadei bad ki jaboh jabaiñ jong ki hospital, da kaba maham ba khlem ka jingpynkhuid bha ïa ki jaboh jabaiñ, ka jingtreikam jong ka hospital ka lah ban ktah ïa ki tyllong um dih jong ki paidbah. Ki la kyntu ïa ki bor pynïaid ban pynthikna ïa ka jingpynïaid ïa ki jaboh jabaiñ kiba paka shwa ban pyntreikam ia katei ka jaka.
U Dr. Kharwanlang u la kren shai ba ka shnong kam pyrshah ïa ka jingplie ïa ka hospital.”Ngi donkam shisha ïa kane ka hospital.Hynrei ngi ban jur ba ïa ki kyndon jong ka jingïateh dei ban burom ha ka shithi bad ka mynsiem,” u la pynkut.
